Pu Con Bik nih kan hmu sehlaw thih than a duh lai: Falam khualipi sinak kha Hakha nih an lak lio ah Falam mipi khawika dah kan rak um dih? Aho tal nih zipeng le mangki zung hmai ah ‘kan duh lo, nan thial kho lo’ tiah an rak au maw? A au ngammi zong an um maw? Hotu le hruaitu kan rak ngei lo maw? Mipi lungfimter khotu zong kan rak ngei lo maw? Kan cathiam le mifim pawl zong zeidah an rak tuah dih?

Falam min ngeitu Tlaisun miphun pasal hna khawika dah an tlau dih? Chinram tlangholh a ngeitu Laizo zong khawika dah an tlau ve? Ralthat lei minthang Sim, Zahau le Hualngo pasal hna zong khawika dah an rak kal? Pu Hlur Hmung phun Zangiat pasaltha hna zong khawika dah nan tlau? Lente le Khualsim pasal tha zong khawika dah nan rak um?

Kan hna maw a rak chet dih ne? Kan mit maw a rak caw dih? Kan lung maw a rak hrut dih? Kan pupa hna cu an ral a rak tha tuk nain an tefa kanmah pawl belte cu zeihmanh kan rak tuah ngam lo, daithup in kan rak um ko.

Minister Pu Ral Hmung nih bawi a tuan hnu tlawmpal ah ‘rup’ tiin Falam khualipi sinak cu Hakha ah a thial ko. Central cozah nih ‘a dik lo’ an ti zong ah zei a rel lo, a pah chih thluahmah ko. A tuah duhmi raltha ngai in a tuah ngam, hi ruang ah Pu Ral Hmung cu upat tlak a si ka ti.

A caan ah cun ‘a rawltam mi uico seh a thawng bik(hungry dogs bite best)’ ti hi a dik ngaimi a si. Falam nih kan ton cang caah kan philh lo a tha. A pawtam mi hna nih savo tha an co tawn, midang nih kan ei cuahmahmi zong an kan chuh ko hi ta. Kan i ralrin lo ahcun kan ngeimi vialte an kan chuh dih lai i ei awk ngei lo tiang in an kan tuah te lai.

Falam pasaltha Pu Con Bik thlankhur in rak tho than sehlaw, atu lio Falam a sining dirhmun hi hmuh than sehlaw zeitindah a um hnga? Zeidah a chim hnga? Nun ka zuam than lo, thih than ka duh, ka ning nan ka zahter tuk a kan ti ko lai. -CNLD Chairman Pu No Than Kap (‘Aw! Falam’ timi a cauk chung in lakmi). Salai Lungthli Tum