Falam District GAD zungah rianṭuantu minung (51) an um i cu chungah cun Pi Rebecca nih March ni (1) thok in CDM ah ka tel cang tiah a rianṭuannak ah ca a chiah tiah theih a si.

Hi kongah Pi Rebecca nih a chimmi cu,” Ka pasal sinah District palik lutlaipa nih na nupi kha zung kai ter ṭhan. Zung a kai ṭhan lo cun, a rianṭuannak an pupa nih zung in a dawi/ṭhawl lai tiah phone in a ka chimh.

“An duh le rak ka dawi ko hna seh a poi loh. Kan chuak lai i si ko cuh ka ti ta. Kan pa rian a ṭuannak an pu hna le ka rianṭuannak an kan pu hna hi a kom tukmi an si i a caan ahcun an i capo lengmang tikah, Capo in a rak timi zong a si kho men. Ka rianṭuannak kan zung i kan lutlai kan pupa nih cun zeihmanh hnahnawhnak (pressure) a kan peknak a um loh. Zung phone zong ka tlai lo,”tiah Pi Rebecca nih cun thil sining fiang tein a chim.

Pi Rebecca a pasal hi Fala peng Palik zung ah ralkaap (တပ္သား) a si. Falam peng GAD zung rianṭuanmi chung cun CDM a tuahtu ahohmanh an um rih lo i dihlak in a caan hman tein zung an kai peng ko rih. Chirhchan: Zalen

Thawngpang thar-Falam ah tlaih a tongmi minung (3) hna cu kum (2) chung thongthlak khawhnak pokmah in dan an tat hna tiah theih a si. Falam khuapi ah ralkaap uknak duhlonak a langhter ruangah tlaih a tongmi minung (3) hna cu tuni ah Court ah Criminal Code 505 in dantatnak an pek hna ti a si.

Hi pokmah hi aamahkhan zong in chuah a ngah lo i thong kum 2 tiang thlaknak pokmah a si. Phaisa cawi le liamter chuah khawh an si lai. Rev. Dr. Thiam Uk nih,”Ralkaap, Palik le htwe uk hna kan leng hna i kan lem cuahmah hna. Asinain, Court ah kan phakpi cang caah Court nih biakhiahnak a tuah dingin kal a si te lai a ti. A tlaihtu palik pawl zong Court ah khing ve hna sehlaw a ṭha lai maw ti kan ruat cuahmah,”tiah a chim.

Kalay ahcun tuni ah an tlaihmi hna cun tuni lila an thlah ṭhan hna. Cun, Hakha ahcun tuni ah an tlaih hna cun thaizing ah a thlah ṭhan hna. Yangon zongah zaankhat lawng an hren hna i a thaizing ah phaisa in an va tlanh ṭhan hna. Chirhchan: Zalen