Falam mipi nih ralkaap uuknak doh in a phunphun in duh lonak langhternak lamzawh an ngei cuahmah lioah Cinmual sang, Economic Bank i rianṭuantu cheukhat cu CDM ah i tel duh loin a thli tein zung a ngeimi an um thotho rih tiah thawng theih a si.

“Cozah ta a simi Economic Bank hmaiah zung rianṭuanmi hna CDM ah i tel ve dingin sawmnak ah voihnih ka tel ve cang. February 19 ah zung hmai ṭhiamṭhiam ah kan va ṭhut hnawh hnawh hna. Tuzing “22222” lamzawhni zongah kan va ṭhut hnawh ṭhiamṭhiam rih hna.

“Bank i rianṭuanmi cheukaht cu an ningzak deuh caah si lai, an zung hmai i mipi kan tam hlanah a thli tein zung an rak kai manh cang hna. Zei bantuk ruahnak dah an ngeih hnga ti zong kan theithiam ti lo,”tiah lamzawhtu lakah a telmi pakhat nih a chim.

Falam Cozah zung rianṭuantu cheukhat cu an pawcawmnak rianṭuanmi nakin CDM cu biapi deuh ah chia in CDM ah i tel in ralkap uknak doh dingin mipi leiah ṭangin lamzawhnak ah an i tel kho ve. Falam i Economic Bank rianṭuantu chungin CDM ah a telmi an um ve i February 11 i an tarlangh ning cun CDM ah a telmi Economic rianṭuantu pawl minung 11 an um.

Cu hna cu U Duh Hre, Daw Ngun Hnem Sung, Daw Iris Iang, Daw Khin Khin, Daw Naomi Lal Lian Par, Daw Ni Hluan, Daw Run Dai Mawi, Daw Run Em Mawi, U Ngun Sui Sang, Daw Lian Za Sung, Daw Ngun Khin Cer hna hi an si. VIDEO

Biakilh: Min fang kan ṭial palhmi le kan hrelhmi um sual cun nan kan theihthiamnak lai kan in nawl duh hna.

Thawngpang thar rel chap: Rev. NC Thawng Tha Thang hruainak in MCYA mino 5000 renglo nih Ralkap uknak duhlo lamzawh. Yangon khualipi ah Rev. NC Thawng Tha Thang hruainak in Myanmar Christian Youth Alliance (MCYA) mino 5000 renglo nih 22-2-2021 ah Ralkap uknak duhlo langhter in lam an zawh, tiah kan theih.

“Atu MCYA hi keimah nih ka hruai hna lio a si. Myanmar ramchung um Khrihfabu kip aa fonh mi Mino Bu pakhat a si. Nihin hi Myanmar Plazza in US Embassy tiang lam kan zawh lai ka ti nain, US ralkap an phiat ruang ah Singapore Embassy lei tu ah kan kal. US Embassy zong lam an hon bak in kan pehzulh than lai. Ca kan chiah mi zong leh ding in bia an kan tiam cang,” tiah Rev. NC Thawng Tha Thang nih The Hakha Times ah a chim.
A peh rih mi cu, “Pathian cu dinfelnak a tanh mi a si. Min Aung Hlaing nih nawlngeihnak a fir in a fir mi le dinlonak in a tuah mi thil cu mizapi nih kan hmuh ko ca ah kan doh ngam cio awk a si. Bible chung zong ah CDM a tuah mi tampi kan hmuh ko hna. Amah belte, Cozah riantuantu ca ahcun challenge a kan tuahtu taktak a si lai i an ca ah a har ngaingai ko lai. Asinain, anmah Cozah riantuantu hna hi kan bochan bik mi an si ko i mizapi zong nih dirpi peng hna usih,” ti zong a chim fawn.

Tutan Ralkap nih nawlngeihnak a laak a voi 3nak, Myanmar ramchung ah Khrihfa Biaknaklei upa hna, mino hna, Kawl biaknak, siseh, biaknak dangdang, Ramkheel party le Ramriantuan (politicians) hna lawng si loin, a bik in Cozah riantuantu le rammi mizapi nih lungrual taktak in CDM cawlcanghnak ah an luut hna. Source: The Hakha Times

_______

Copyright © Chin World News Evening