Salai Van Lahnin||21-2020| World News||Vawleipi nih a cuanh cuahmahmi US rampi thimnak cu lim a si cang. Asinain, US rampi President thimnak vialte chungah tukum hi a buai bikmi a si lai tiah zumh a si. Cun, cheukhat nih an ti rihmi cu tukum thimnak hi lihhrokhrol atam bik kum zong a si lai tiah ruah a si.

US rampi thimnak dai tein a dih khawhnak hnga le phaisa thazaang in rian a ṭuanmi an rak um ve. Cun, mah le ṭanhmi teinak an hmuhnak hnga tiin phaisa chawva in a ṭangmi le thazaang a chuahmi zong an rak um ve. Tutan ah Social Media vialte lakah kan hman bikmi Facebook ngeitu pa Mark Zuckerberg zong nih tukum thimnak caah phaisa tam taktak a thawh ve.

Tukum US thimnak cu State kip i vote thlakmi an rel tikah thil dik lo tampi hmuh a si. State cheukhat nih cun hi thil dik lo a ummi phozar dingin an izuam i cawlcang len ve. Tukum US President thimnak cu hitining in a buai ko rih ahcun Congress le Senate nih President a thim te lai ti zumh a si. Cu bantukin thil a si ahcun Trump nih teinak a hmuh lai ti hi zumh le ruahchannak ngei cio a si.

US rampi thimnak ah Facebook ngeitu Mark Zuckerberg le a nupi cu tangka chawva leiah thazaang chuah ve in an nupa in $419.5million bak US thimnak caah an hman. Cu chungah $350million cu “Safe Elections” (thimnak a himnak ding caah) ding caah ṭhen a si. $69.5million cu Center Election Innovation and Reserch caah ṭhen le hman a si.

Cu lawng hmanh si loin Facebook rianṭuantu Biden a ṭanhmi zong tangka a thawhter hna. Facebook Vice President Erin Egan nih tukum thimnak ah Biden a cawlcanghnak le a thazaang a ṭhawnnak ding caah $2,800 voihnih taitai a pek. Facebook Chief Officer David Fischer nih Biden caah tiin $2,800 le $750 a peek ve. Facebook Financial David Wehner zong nih Biden caah tiin $2,800 a peek ve. A dang Facebook rianṭuantu minung 6 zong nih Biden caah tiin $2,800 cio an peek ve tiah theih a si. Chirhchan:Breitbart

Thawngpang dang rak rel chih-President Trump Nih Martial Law Chuah Dingah Ruahnak Hal Hna. President Donald Trump nih ruahnak a petu hna cu a auh hna i martial law chuah khawh a si le si lo, martial law chuah ah zeidah a cang kho? martial law chuah in zeidah an tuah khawh timi le US phunghram ah martial law chuah khawh a si le si lo ceihmainak tuchun ah an ngei.

Martial Law chuah ding ruahnak hi General Michael Flynn nih a chuahpi mi a si. President nih martial law a chuah hnu ah ralkap nih a herhning in tuanvo an laak lai, White House ah Joe Biden lut lo dingah an kham lai.

Swing state 5 ah vote firnak le hrokhrawlnak a ummi vialte kherhhlai dingah special counsel caah Sidney Powell tuanvo pek an timh. Tuanvo an pek taktak ahcun voting machine pawl le vote firnak le hrokhrawlnak vialte an kherhhlai dih lai i, report an pek lai.

Martial law an chuah taktak ahcun vote thlakning le vote relning a buai tuknak, Battle ground state 5 ah thimnak a thar in tuah a si kho men. Asinain US constitution nih a onh taktak le onh taktak lo fiang tein an chim kho rih lo. President Trump nih biachahnak taktak a tuahmi um rih lo. Source: Salai Lairamthang