Esther Dawt Chin Sung le Benjamin Sum Melbourne dam tein an phan cang. Australia ram meikaang hartongmi hna bawmhchanhnak caah Australia Chin Community (Eastern Melbourne) Inc. hruainak in Bushfire Relief concert tuah dingah Esther Dawt Chin Sung le Benjamin Sum cu dam tein Melbourne an phan cang.

Tutan 13 March 2020 (Friday) i tuah ding mi Bushfire Relief concert cu Chinmi nih a kan cawmtu hna ram caah kan thazaang dihlak chuah in bawmchan ve hna ding in tawlrel mi a si. Chinmi hi bawmhmi lawng si ti loin mi bawm kho tu zong kan si ve ko ti langhter duhnak he tuahmi zong a si. Cu kan saduhthah a tlin khawhnak hnga lunglawm tein a kan cohlang tu Esther Dawt Chin Sung le Benjamin Sum cungah kan i lawm. Cun, a hun kan thlah piaktu Myanmar Idol cung zongah kan lung a lawm fawm. Bawipa nih daihnak he lam hruai camcin ko hna seh.

Hi Bushfire Relief concert cu thiltha le thil lianngan kan tuahmi a si caah ram mi hna zong nih thazaang a kan pek i a kan lawmh pi ngaingai. Kan MPs pawl hna le Upa hna nih a kan telpi lai. Australia media lian bik pakhat SBS zong an ra lai. Tuanbia tha pakhta kan tial a si lai. Na thoknak cu hme hmanhseh na donghnak lei cu a ngan lai. Melbourne khua khuasa Chinmi dihlak thazaang chuah in chuah khawh dih i zuam hna usih. Nan dihlak kan in sawm hna. Lawmhnak he, Australia Chin Community (Eastern Melbourne) Inc.