“Myanmar Idol kan zoh tik ah zungmawi (arts) ti mi a muru tampi nih kan hun hngalh. Cun, zungmawi ti mi hi ramri a rak ngei lo i vawleipi a cuul kho mi a si. Esther Dawt Chin Sung zong Pathian nih a cawisan i Chinmi kan arfi pakhat ah aa chuah pin ah zungmawi lei ah a hun kan hliphlauter. Myanmar Idol hi 2016 kum in an thawk mi a si i 2019 cun kum 4 a si ve cang. Zeitik tiang an pehzulh khawh lai, ti cu a fiang lo nain nihin an tuah khawh mi tiang ah Winner (Idol) kan hmuh khawh mi hi Chinmi nih tuan- bia kan tial a si ca ah pumpak in kaa lawm i, Chin Ramkulh Cozah ai-awh zong in lunglawmhnak bia ka chim,” tiah Social Affairs Minister Pu Pau Lun Min Thang nih lunglawmh biatawi chimnak ah a chimchih.

Tutan MMID Idol donnak ah Donnak Committee Chairman Pu Thla Hre nih, “Mizapi thinlung kuai kho ding in hla a sa khotu, winner song; aphyu-yaung ti mi hla in teinak a hmutu Esther Dawt Chin Sung, Hakha khuami dihlak nih lunglawmhnak he kan in don. Pathian nih nangmah thawng in Chin miphun a kan cawisan chin lengmang ti a langhter ca ah kan i lawm khun. Nay Pyi Taw ah a voi 16nak tuah mi Su-kah-ziti lio ah Winner, 2017 CACC Chin Idol (Winner), 2019 Myanmar Idol (Winner) na si khawh ca ah kan i lung aa lawm tuk. Pathian nih in cawisang chin ko seh,” tiah donnak ah amah nih Thingparsang hla a phuah mi rel pah in a chim.

Chungkharlei in a pute a si mi, Pu Hmun Thang nih, “Nihin ah kan tunu a dawtu nan dihlak cung ah kan i lawm tuk. MMID ah hlasak aa zuam mi vialte hi an thiam dih. Kan tunu Esther hi a thiam bik hlei ruang ah si loin Pathian zaangfahnak thawng in siseh, ramchung ramleng in vote nan pek, nan tangka le nan caan dih in nan dirpinak thawng in nihin ah teitu a sinak hi a si. A hmailei lamthluan zong ah kan dirpi peng rih u,” tiah lunglawmhnak biatawi a chim. Tutan Esther donnak ah thlacampiaknak, laksawng peknak, donnak biatawi chimnak, lunglawmhnak, chungkhar lei lunglawmh biachimnak, hmanthlaknak, zaanriah dumtinak tibantuk in caan an hmang.Credit: The Hakha Post (TVOM)