Esther Dawt Chin Sung Dirkamhtu Sin Ah: Tulio Myamar Idol ah Top 8 chungah a lut cangmi Esther Dawt Chin Sung hi ka theihmi le ka hngalhmi a si lo. Asinain Chin Idol a zuam lio tein a hlasak ka uar I, pakhatnak co seh ti zong ka duh piak I, pakhatnak zong a co taktak. A aw that lawng si lo, hlasak hrimhrim a thiam. Cu lawng si lo, thil hruk aih zong a thiam I, a muite zong duh a nung, cu hlei ah biachim zong a thiam fawn.

Myanmar Idol zuamnak hi ka zohmi a si lem lo. Asinain tutan cu Laimi minung 4 top 10 tiang an kai caah ah ka lung a ka laak ve caah hrelh lo tein ka zoh ve. Top 10 chung zongah Esther Dawt Chin Sung thiamthiam nih ka lung a ka laak bik fawn. A thinlung a nenno nain hlasak ah a ral a tha, confidence a ngei. Minthang cia hlasakthiam hna bantuk in hla a sa kho. Zeibantuk hla, country/pop/rock a sak poah ah a sak khawh.

Minung kan si caah kan uarmi a khat bal lai lo. Ether DCS kan uar ruangah Benjamin Sum kan uar lo tinak a si hlei lo. Esther DCS kan dirkamh ruangah Yaw Kee le Benjamin Sum kan dirkamh hna lo ti a si hlei lo. Kanmah kan duhmi cio kha dirkamh cio ding a si ko. Aho dirkamh cio hmanh ah isoisel ding pakhat hmanh a um lo. Mah le duhmi le uarmi cio kha dirkamh cio ding a si. Zeicatiah Myanmar Idol cu minung pakhat te lawng nih co dingmi a si ruangah a si.

Kan hnu zarh ah ka uar bikmi le ka zumh bikmi hna, Esther DCS, Aye Mya Phyu le Tan Khun Kyaw bottom 3 ah an thutter mi hna kha cu ka lau taktak khi a si. Game a I celh an ti nain vote thlak kan daithlan ruang zongah a cang khomi a si kha philh ve lo ding a si. Zapi nih kan theih a herh vemi cu Myanmar Idol tuahnak caah phaisa million in a dih lai. Ahohmanh nih sipuazi an tuah ah miakmi um lo in sipuazi tuah phung a si lo. Cucaah phaisa an hmuh khawhnak dingah game a phunphun an I celh ko lai. Game an I celh ti ruangah kan dirkamhmi hna vote kan pek hna lo ahcun thaizing zongah an thlak khawhmi hna asi. Tan Khun Kyaw zong an thlak taktak.

Esther DCS bottom three a thut ter kha cu Esther DCS supporter a simi poah kan lau dih. Keimah telh in kan daithlang. Final hrawngah voteka thlak te lai tiah ka ruah sual ve. Vote voikhat kan thlakmi kha voi khat zuamnak ca lawng a rak si. Cucaah an izuam caan, zarh khat voi khat bak in vote thlak ahau tinak a si. Top 10 chungah Esther DCS vote tam bik a rak hmuh caah a supporter pawl kan daithlang tiah ka ruah. Vote thlak kan I rinh dih sual rua. Cucaa tutan thawk in cun vote thla cio hna usih. A dih dongh tiang lawlaw ttan kan laak a hau.

Vote thlak tikah Prepaid Card hman ah a tha bik. Prepad Visa card, Master Card tipawl kha 7Eleven dawr, Giant, SafeWay, CVS, Walmart, Target , Marcys le JCPenny tibantuk dawr ah $20. $30,$50 tibantuk in cawk khawh a si. Kan bank card le credit card a him sual lai lo ti a phangmi poah nih mah cu hmang cio te uh. Keimah zong prepaid cu ka cawk ve. Eshter DCS nih Myanmar Idol a hmuh ahcun Chin miphun kan min a tha lai. Second Sung Tin Par kan I ngeih chap bantuk zong a si lai. Credit: Salai Lairamthang