Esther Cu Sunglawi Taktak In Hakha-Thantlang Pinah Pomkam Khuami Vialte Nih An Don Lai

Chin News

Myanmar Idol Season-4 Winner Esther Dawt Chin Sung Hakha, Thantlang le a kiangkap khuate khuami nih an don lai. Myanmar Idol Season-4 hlasak zuamnak ah pakhatnak a co mi Chinmi Esther Dawt Chin Sung cu Hakha, Thantlang le a kiangkap khuate khuami nih a umnak Hakha khua, Vum Thu Maung ceertual ah an don lai.

Image may contain: 1 person, smiling

Myanmar Idol Season-4 Winner Esther Dawt Chin Sung cu zeitik ah dah Hakha khua a phak te lai i zei caan ah dah don a si te lai, ti mi a ni le a caan a fian khawh rih lo ca ah thawngthanh than a si te lai. Myanmar Idol Esther Dawt Chin Sung lawng siloin Myanmar Idol Season-4 ah Chinmi aa tel mi Benjamin Sum, Yaw Kee le Tan Khun Kyaw zong sawm an si. Cun, Top 11 chung a luut mi zong sawmchih dih an si. Asinain, top 11 chung a luut mi an dihlak in an rat khawh lai le rat khawh lai lo ding a fiang rih lo.

Image may contain: 1 person, standing and wedding

Myanmar Idol tawlreltu upa cheukhat zong nih an rak zulh lai i Kalaymyo lei ah an tlun lai ca ah Hakhathar in don hmasa a si lai i Vum Thu Maung ceertual ah lanh te ding in timh a si. Myanmar Idol Esther Dawt Chin Sung donnak kongkau ceihmainak cu December 30, CACC Hall ah tuah a si i cu hmun ah Main Committee le Sub-Committee zong an ser. Committee Chairman ah Chin Ramkulh Sipin Lutlai hlun Pu Thla Hre a si. Hi ceihmainak hmun ah Biaknak lei, Zaatlangbu lei, Thawgthanhtu lei tibantuk in aiawhtu hna an i tel.

Esther Dawt Chin Sung nih Chinmi ca ah tuanbia aa dawh tuk mi le a sunglawi tuk mi a kan tialpiak. Chinmi kan i lawm dih lai ka zumh, kan i lawmh awk zong a si. Winner cu chimlo, top 11 chung a luut mi pawl hmanh an khua an tlun ah hlunghlai tuk in an don hna. Kannih Winner a co mi don chinchin ahcun kan tam chinchin awk a si i kan don cio awk zong a si. Zeitluk in dah kan i lawmh cio ti mi kan langhter ding a si, tiah Esther donnak kong ceihmainak hramthawk ah CACC Dr. Khar Ling nih a chim.

Myanmar Idol Esther Dawt Chin Sung donnak hmun ah don mi Myanmar Idol pawl lawng nih hlasa loin tualchung hlasakthiam hna zong nih lawmhpinak hla an sak ve lai. Myanmar Idol Season-4 Winner Esther Dawt Chin Sung don ding ni le caan cu thawngthanh than a si te lai. Credit: The Hakha Post

Leave a Reply