Hakha lei nungak cheu li cheu thum cheu li ning hmanh an si kho nih Ben Ben an ṭanh tik ah cun, Bottom va panh lengmang zong cu a mawh hme maw? Chin kan lungrualnak caah tiah Falam le Mindat tlangval pawl zong nih Esther rak ṭanh pah ve u ca. Nain kei ka dirpi ning cu Kan rualchan, kan hawikom, kan Miphun an si caah le Hakha, Falam, Mindat an si ruangah kan ṭanh hna ding a si lo. An thiam ruang tu ah kan ṭanh hna awk a si.

Vawlei pi hmai ah Myanmar hmai a hngalter khotu le Myanmar nih vawlei pi hmai ah aa chorpi ngammi a si bak bak tiah na zumhmi kha ṭanh ding a si. Na fanu na fapa, na u na nau nih hla le ringawn lei in karhlan aa tim ahcun hlasak lei in siseh, nunzia lei in siseh, lungput lei in siseh, umtu hoihher lei in siseh, anih bak khi naa zohchun ding a si tiah na ti kho dingmi kha na ṭanh ding a si. Cucu thildik ṭanh kan timi cu a si i dinnak ah hram a bunhmi a si.

Chin Miphun nih MMID ah winner co hna seh ti na duh i Chin Miphun lianhnganter na duh ahcun na rualchan ṭanh ngol law dinnak tu ṭanh cang. Miphun a lianhngantertu cu dinnak a si tiah Pathian Bia nih fiang taktak in a chim. Phundang in chim ahcun Miphun ṭanhnak nih miphun a lianhnganter lo tinak a si. Miphun kong in nan aukhuan a tam tuk ruangah Kawlmi tampi nih a thiamnak le a sinak an ṭanh taktak i fawite in a kai lengmangmi Esther hmanh a tla hnik lengmang ko khih. Credit: Bawi Bik Thawng