Saya Van Tum nih Trump ttanhtu pawl hna hi a ka hnemh le fimhchim kan her lo. Amah tu hi hnemh le fimchim tu a her te lai. Trump nih mirum le anupi Melania a dawhtuk ruangah kan uar mi le ttanh mi a si lo. Mah hi Saya Van Tum cu nih vun thei ve seh.

Pakhatnak – Bill Clinton, Amah hi Democrat party lei in president a si mi a si. Bill Clinton President a rak si lio ah khan, US cu ramdang Pali he, heh tia buainak fakpi an ngei. Raltuk tiang a chuak i, US mipi nih an rian tuannak in tangka (Tax) an pek mi kha raltuknak ah heh tiah hmang a si.

Cun ramdang an va tuk mi thil an hrawk piak mi le a thi mi cu an tam kho tak tak. A dang cu chim lo. Kosovo ah thil an hrawh mi man vialte kha USD 31 Billion leng si kha. Adang cu chim lo in zeitluk in dah a tam lai ti kha na fiang ko lai. Mah ram pali hna cu Kosovo. Haiti, Sudan, Afghanistan an si. US ralkap minung tampi an thi hlei ah US economic nih a tuar ngai i, leiba tampi a chap kha

Pahnihnak – W. Bush, Amah hi Republican lei in President a si. Bush President a rak si lio a khan ramdang pahnih heh buainak fakpi a chuak i, raltuknak tiang a chuak kha. Mah raltuknak a hin US mipi nih an rian tuannak in tangka an pek mi (Texas) tampi hmang a si. US leiba a kar chin lengmang. Cu ram hna cu Iraq le Afghanistan an si. US ralkap tampi an thi i, US nih leiba tami a chap

Pathuamnak- Barack Hussein Obama. Amah hi Democrat lei in President a si mi a si. Obama lio ah khan ramdang panga hna cu US he buainak fakpi an ngei. Cu ram hna cu, Libya, Syria, Yemen, Afghanistan le Uganda an si. Raltuk ruangah mipi nih an rian tuannak in tangka an pek mi (Tax) an hmang mi cu a tam tuk. Mi tampi an thi i, US ralkap tampi an thi ve. US nih leiba tampi a chap

A dawngnak ah President Trump- President Trump lio ah ramdang he buainak, raltuk a ngei ti mi thawngpang na thei bal maw? Raltuk ruangah President Trump nih US mipi nih an rian tuannak in Tax an pek mi a hmang ti na thei mi a um maw? Chim ding na ngei lai lo. Vawlei ah tih nung bik an ti mi, Obama nih zeitin hman a tuah kho lo mi IS pawl kha US navy seal hmang in a daihter dih hna.

US caah tih nung tuk mi Soleimani, President dang nih an rak thah kho lo mi General Qasem Soleimani kha a tha. Democrat pawl nih cun US ral a si mi Soleimania a tha mi kha an thin hun ngai hoi kha. Na pi Nancy Pelosi cu heh tiah a zai hoi kha. Na News rel tawnnak New York Times nih US ral a si mi Iran General Qasem Soleimani kha Hero bantuk in an tial hoi kha. President Trump lio bantuk in vawlei cung ramkip daitein le hna ngam tein a hlei in US, an um mi bantuk in Mah President a rak si cang mi pathum, Bill Clinton, W. Bush, le Obama lio ah an um ti na thei bal maw?

Obama nih a tuahnak ding lam ka thei lo tiah a ti mi North Korea Chairman Kim. Trump nih White House ah a va leng lio ah Obama nih a chim mi, Obama nih Trump sin ah, President na si hnuah North Korea Chairman Kim Jung Un hi ceilak in na buaipi lai hi aw. Na lungrei an theiter bak lai tiah a rak chim mi kha, President Trump kumhnih rian a vun tuan cu, North Korea Chairman KIM, Obama lio ah chiandeih bantuk in a au lengmang mi kha, daihtein a um kha.

Afghanistan ah US ralkap tampi, Taliban tapung ruangah an thi tawn mi, US ah kir a duh ngai mi hna, kir kho lo in Taliban ral ruangah Afghanistan ah a um peng mi kha, rak kir cang u, dainak kan ser lai. Dainak ser hi a sunglawi bik a si tiin a ti hna. I thim hlan te zongah US ral a si mi, Taliban pawl hman nih Trump an uar tuk i President si than din in endorse an tuah kha

(Natein tapung nih endorse an tuah mi a si caah Trump nih a cohlan lo kha mu) Trump hi Bible nih a kan chim/cawnpiak bantuk in midang he remnak le daihnak sertu a si ti hi rak phi hla mu. Democrat pawl/liberal an sual tuk ruangah heh tiah an doh mi hi thatein thei i zuam hmasa law a tha lai. Trump ttanhtu pawl hna hnemh le fimchim kan her lo. Democrat pawl tu hna kha thatein Trump bantuk in US ral a si mi le Pathian nih a kan cawn piak ning bantuk in daihnak va ser ding in va chimh ko hna.

Joe Biden President elect a vun si hnuah, North Korea chiangdeih. Trump lio ah daihtein a um mi nih, US hi kan ral bik a si. Nuclear duh poah in kan ser lai tiah Joe Biden cu message a kuat cang kha. Trump President a rak si lio ah Iran nih a tuah ngam bak lo mi “strategic missile bases” cu Persian Gulf rili pawngah an chia bak cang kha. Isreal caah zeitluk in dah tih nung. Mah President a rak si cang mi, Bill Clinton, W. Bush. Obama lio ah raltuk ruangah US mipi an lungreithei ning le an mangchia ning kha thei i zuam ta. Cun President Trump lio ah ral tuk ti thawngpang a dai ning kha tha tein thei i zuam ve. Atu hi Joe Biden inauguration an tuah hlan bak in Israel he heh tiah an buai than hoi.

Obama President a tuan lio nak in Israel le US pehtlaihnak a chia deuh lai tiin mi tampi lungrethei in an um cang hi. Obama lio ah (Joe Biden Vice President lio ah) IS pawl sin ah tangka tampi in a bawmh tu hi, Joe Biden a vun si a cun vawlei cung nih zeibantuk in IS hi an buaipi te lai ti kha atu mithiam pawl nih heh tiah an ceih cuamah cang hi aw. A herh ah cun Bible hmangin Trump ttanhtu pawl hnemnak le fimchimhnak na tuah i, Bible thiam thiam in nangmah chimhrimhnak le lehnak ka vun tuah te lai. Bible nih ” Midang tahnak na hmang ning bantuk in tah nan si lai” tiah a chim kha mu

Dr. Van Tum (Dr in Theology) nih Trump ttanhtu pawl fimchimhnak tiah a tial mi kha ka hmuh ve. Ka rel ve, Natein amah tu hi hnemh le fimchimh a herh te lai ti ka hmuh caah mah hi ka vun tial mi a si. Trump ttanhtu pawl nih Trump kan uarnak ruang Point 9 ka tial cang kha. Mah lehnak ka tuah hnuah, a dang tial ka tim ti lo, Natein a hnuah, Trump supporter pawk hnemhnak le fimhchimnak ti a vun tial mi ka rel hnuah tial than a hao ti ka hmuh caah ka vun tial than mi a si. Amah Van Tum ka huat ruangah si lo, thil sining fiang tein vun langter ka duh ruangah a si

A her ah cun, Pathian nih Saul a kaltak bantuk in Trump a kaltak ti a tial mi lehnak fiang cik cek in ka vun tial than lai (A her a cun) Cun Trump ttanhtu pawl, Chin Pastor a soisel mi kong zong a herh a cun ka vun tial than lai Cun Elijah thlacamnak le Baal prophet minung 450 thlacamnak hmang in Trump ttanhtu pawl a ta chun mi kong fiang cik cek in ka vun leh than lai (Chin Journal ti facebook page kha like le follow vun tuah law, ka leh nak na hmuh kho peng lai) Credit: Madison Lianching