Dr. Rual Uk nih Noah a sermi kha lawng si loin kuang asi tiah a chim i, hi kongah Dr. Aung Myant Thang nih kuang si lo, lawng si tiah a chim ve. Hi kongah Edel Khuma Thlauhthang nih a tanglei bantukin Dr. Aung Mynt Thang lehnak atuah mi a tanglei ah kan rak langhter. Dr. Rual Uk chim mi maw kan zumh deuh lai? Rev. Dr. Van Bik le Dr. Aung Myint Thang chim mi dah? Na ruahnak rak langhter ve.

Edel Khuma Thlauhthang: Adik ve ve. Zeihmanh thei ve tak tak hna ttung lo hin nan holh te hi a tam ve tuk ai. Ark hi Long tinak lawng a si lo khi. Dr. Rual Uk lehning kha adik tuk. Bawm timi kha adik tuk. Dr. Rual Uk nih hin Bible hi hrawkhrawl in a lehmi a si lo teh. Mirang Bible hi a dihlak ah Uk zeizatdah a um nan thei maw? Cun, Dr. Rual Uk tlukin Bible theimi leh hrilhfiah kho mi hi Laimi ah a hohmanh an um rih lo.

Hakha Crusade Camping an rak tuah zongah khan Ni 100 leng lo an rak tuah i, Dr. David Van Bik zong nih khan Bible hi ka leh ko nain Rual Uk nih a hrilhfiah hi cu a thiam tuk. Ka tluk lo i amah nih ti ko seh a rak ti i a rak pek. Ni 100 leng lo ah Dr. Rual Uk nih hin a chim ciami Sermon pakhat hmanh a nolh bal lo. Dr. Rual Uk hi cu Thantlang Baptist le Hakha Baptist hrim hrim nih cun an rak zenh tuk teh. Bible thiamnak ah an pha lo tuk hme cu.

Dr. Aung Mynit Thang: NOAH NIH A SERMI HI “LONG” MAW ASI “KUANG” DAH? Rev. Dr. David Van Bik nihcun “long” tiah a ti. Evan. Dr. Rual Uk nihcun “kuang” tiah a ti. Zei biafang dah hmang usih law a hman deuh hnga tikha ruat hna usih! 1. Evan. Dr. Rual nih “Noah long” ti loin “Noah kuang” tiah a tinak sullam cu long cu a zahnak ‘athainak’ a um awk a si. Noah long cu a thainak ‘azahnak’ a um lo caah, mah duhnak hmun ah kal ter khawhmi a si lo caah “long” tiah kan ti awk a si lo, “kuang” tiah kan ti awk a si tihi a dirpi mi a si.

2. Cun, Evan. Dr. Rual nih a chimmi hi hman dawh ngai a si rih nak cu Noah long cu “Noah’s ark” ti a si. “Noah’s ship or Noah’s boat” ti a si bal lo. Asiah “ark” timi hi zeitindah kan leh lai? Moses chan in Babylon sal an tan tiang Israelmi nih an neihmi cu Pathian kuang a si i cucu “ark of the covenant” ti a si. Hika zawn ahhin “ark of the covenant” cu “biakam long” tiah kan ti kho lo, “biakam kuang” tiah leh a si fawn. Cu nihcun Evan. Dr. Rual nih “long” siloin “kuang” tu a si a timi ruahnak hi “ark” timi biafang hi kazawn i an hman ning nih hin a van bomh ngaingai.

3. Asinain “Noah long” ti ti loin maw “Noah kuang” kan ti dih ne hna lai? Keicu ka ti kho lai lo. Kei nihcun “Noah long” ka ti tthiamtthiam ko lai. Zeicatiahcun: a. Laimi nih kuang kan timi, tikuang, vokkuang, tehna cu thingtum pakhat lawngin sermi khi an si ngawt. Noah long cu thingtum pakhat lawngin sermi a si lo caah “Noah long” tihi a hman deuh ko hnga tiah ka ruah.

b. Cun, thingkuang, ruakkuang tehna khi kan auh tikah “kuang” timi biafang kan hman ve. Hihna pawl hi thingtum pakhat lawngin sermi cu an si fawn lo. Thingphel tampi in sermi an si ko nain “kuang” kan ti fawn hna, long kan ti hna lo. Hi nihhin Evan. Dr. Rual chimmi kha a van bomh tthan. Asinain “kuang” kan tinak a ruang cu, ruakkuang le thingkuang cu ti cung ah minung nih i citmi a si lo caah le minung i cit awktlak in a nganmi an si lo caah kuang kan tinak a si ka zumh.

c. Cun, thing luang pakhat lawnglawng in kan ser i ti cungah kan i citmi cu “vok kuang long” kan ti. Hi zawn ahhin “kuang” zong kan hman i “long’ zong kan hman tthiamtthiam. Asiah “Noah kuang long” tiah teh a hman ve ne hnga maw? d. Cun, Laimi nih kuang kan timi cu a chungah khua kan sak khawh nak hmun khi kuang kan ti hna lo. Noah nih a sermi cu dong 300 a sau i, dong 50 a kauh i dot thum asi caah “kuang” nakcun “long” tiah a hman deuh ko tiah ka rauh. e. “Ark” timi hi English dictionary tampi nihcun “the ship built bu Noah” tiin an fian ter. Cucaah Noah kuang ti nakcun “Noah long”tihi kei cu a dikmi ah ka ruah ko.

f. Cun, Evan. Dr. Rual nih long cu azahnak a um lawngah “long” asi a timi he pehtlaiin tilong nganmi ‘ship’ an ser liomi khi kan zoh tik ah azahnak an ser rih lomi a si ko zongah tilong ‘ship’ kan ti tthiamtthiam ko. Cucaah long cu long asi nakhnga azahnak a um le um lo in tuah ding a si lo. Alianhngan ‘size’ tu in kan zoh awk a si i, zeibantuk caahdah an hman mi a si tiin kan zoh awk asi i, cun zeibantuk hmunhma ‘rili ah maw, tiva ah maw, inn chung ah maw’ hman awk ah an ser timi nih “long” le “kuang” cu a fian ter ko tiah ka ruah. g. Ti cung i minung nih i citmi cu “kuang” a si bal lo, “long” asi peng. “Vok kuang long” hmanh ah khin “long” timi biafang ai tel. Cucaah Noah long” timi hi kei cu ka uar.