Mirum le Misifak a thleidan tertu Party? Ralkap, USDP Uk lio ah cun mirum nih misifak cu sal bantuk in zohchuk a rak si. NLD Cozah a kai hnu in i thleidannak a um ti loh ti tluk a si cang. Hnu lei kir thanding cu a ruah in ka ruat kho loh. Uknak Hlun an zia za.

1. Telephone man / Mawtaw man le Thil tha deuhpoh man cu Vantawng ah an kai ter i, an mah lawng nih an ni cawk khawh. 2. An mah lawng nih Electric an van khawh. 3. An mah lawng nih Tanda um loin rian an ngah. 4.Misifak thla hlawh tlawm tein an pek hna. 5.Ramleng ah hlawh fa nak lam an kham.
6.An mah lawng nih ramdang an rak tlawng kho. Uktu Bawi le Mirum an ni kawp ciam man i misifak cu sal bantuk in mit au ngam lo in rak um a rak si.

Kan miphun le kan ram luatnak caah NLD. Pumpak Bawi duh ruang le Uknak hlun kir i power ngeih duh ruangah Party tamtuk a um i, USDP Ralkap he rian a tuan ti ding an si hna. Chin mi na lung rak fim ko. Cattialtu: Dr. Piter Ngun Za Cung

Relchih>>>>Ralbawizik Hruaimi Phukomh Cozah An Tlin Sual Citcet Ahcun Mu. Biahramdomh: Atu Kawlram dirhmun ahcun party pakhat thazang in cozah a ser khomi cu NLD lawnglawng hi a si. USDP hi cu ralkap dirhmi an si bang, ralkap hnuk thlum rinh i a nungmi a si ko. Ralkap he i bawmh bu zong cun, anmah thazang lawng cun cozah a ser kho an si ti hoi loh.

Cucaah, NLD Party thlak i anmah nih cozah tlaih awkah phukomh cozah dirhnak ding caah kum zeimawzat chung an i zuam. Ralbawizik hruainak in Kawl party tetuai pawl le tlangcung party pawl cu hehchet an sawm hna. Pohmah 261 hmangin an soilem khawh hna. Phukomh cozah cu hei chuak sual pingpang selaw Kawlram ah zeidah a chuak te hnga?

I. Cozah Uknak kongkau: ( 1 ) Phukomh cozah a chuah ahcun ralbawizik cu President a si lai. ( 2 ) Rampi cozah cu anmah ralkap le USDP nih an tlaih dih lai. ( 3 ) States le Regions Chief Minister zong ralkap le USDP nih an tlaih dih lai. ( 4 ) Nelrawn ah regions cozah i minister vialte zong ralkap le USDP nih an tlaih dih lai. ( 5 ) Ralbawizik President tlinnak caah vote petu tlangcung party chungin State cozah chungah minister pakhat cio laksawng ah a pek hna lai.

II. 2008 Phunghram Kongkau: 2008 Phunghram cu Ralkap phunghram a si bang, an dirhmun a feh chin chin khawhnak hnga an duhningin an remh chap rih lai. 2018-2019 ah NLD nih phunghram remh ding an ti lio ah khan ralkap lei nih an duhning cu fiangten hmuh khawh a si cang. Zeitindah an remh te ne lai?

( 1 ) Pyithawngsuh hluttaw le Pyine hluttaw chung i ralkap 25 cu 50 ah an karhterte lai. Mah hi pohmah remh ding hi 2019 lioah USDP MP U Maung Myint nih a rak chuahpi cangmi a si. Hluttaw kip i ralkap 50% an um hnu ahcun USDP caah cun MP 1% lawng an hmuh zongah ralkap 50% he fonh in cozah an ser zungzal cang lai. Ralkap nih a kan uk peng cang lai.

( 2 ) National Security and Defence Council cu full power an pek lai. President le Pyithawngsuh hluttaw zong dinhter khawhnak phung an ser lai. Hi pohmah zong hi ralkap nih an rak chuahpi cangmi a si. NSDC hi chungtel 11 an si i ralkap 6 le cozah luban 5 komhmi phu an si.

( 3 ) Tlangcung party pawl lomhternak caah pohmah 261 an remh lai nain Pyine hluttaw ah ralkap 50% an um cang lai caah anmah ralkap nih State cozah he, Union cozah he an tlaih peng cang lai. Tei awk an tha ti lai loh. (4) Hluttaw kip i ralkap 50% an um cang hnu cun an duhning poh in an tuah lai caah phunghram remh awk a tha ti lai loh.

III. Remdaihnak: Kan chim cang bangin phunghram an duhningin an remh cang hnu cun democracy le federal hmuhnak ding lam a pelpawi zong a um ti lai loh. NCA lam zong a rawk dih te lai. Tukdohnak fakpi a chuak than lai. Ralzam an karh thluahmah lai. Nuhmei le ngaktah an karh lai. Tlangcung hmun kip ah ttah aihraamnak thawng a thang lai.

IV. Min Aung Hlaing le ICJ: Atu ralbawizik hi ICJ ah case nganpi aa orh liomi a si, Aung San Su Kyi nih a chanh khawh rih caah a him rih, nain a case dong rih loh. Crime Against Humanity ( Miphun cihmihnak ) case nganpi a si. President a tuan ahcun ICJ le ICC authawng a thang chin chin lai. Ramleng a chuah ahcun an tlaih lai i hremnak fakpi aa huah lai. Vawleipi hmaiah ningzak tuk kan si lai.

V. Biaknak Thleidannak: Biaknak le miphun thleidannak a karh thluahmah lai. Wira Thu bantuk buddhist ralhrang phu an chuak thluahmah lai i biaknak dang caah hmunhma a um te lai loh. VI. Sipuazi le phihkharnak: A cung i kan langhtermi ruangah UN, US le EU ram pawl nih sipuazi lei phihkharnak fakpi an tuah lai. Ram chung i a um ciami company pawl hmanh an chuak dih lai. Human rights zei i a rel lomi Tuluk company an khat dih lai i Kawlram cu North Korea bang mangtam nih a tlunh peng lai.

VII. Biafunnak: Cucaah ralbawizik hruaimi phukomh cozah a chuah sual ahcun kan ram cu khuaci a mui dih te lai. Mah cucu hrial khawh a si. Phukomh cozah chuah lonak dingah tukum election ah hin ralkap hnuzul a simi poh poh cu hrialin, NLD party vote pe cio hna usilaw, kan ram cu rawhralnak chungin kan khamh khawh lai i, NLD nih Kawlram cu Federal democracy ram ah le Asia Cakei ah a chuah te hrim hrim lai. Tlangcung party pawl hi zumh ding an si ti loh, NLD ah kan i fumtom cio a herh.-Victor Pa