Dr. Pari Sermon Hmangin Thazaang Rak La Ve Siibawi Asinain Phorhlawtnak A Ngei Lo A Sertu Pathian A Philh Lo Uar A Um Taktak

Visible things are the example of invisible things. Hmuh khawhmi thil hna hi hmuh khawh lo mi Thlarau riantuan ningcang a kan hngalh tertu an si timi bia hi Baibal Thiang bantuk a si.

Arti khi a lenglei in thawnnak thazang pa khat khat nih a den ahcun a nunnak a dih. Nain chunglei in thawnnak nih a den ahcun a keuh i nunnak hram ai thawk. Zumtu Krihfa nun timi zong hi chunglei kan thlarau chungin Krih nih kan ziaza thalo vialte kha man cikcek in a kan den piak hnu ah Krih sinin a hung luangmi nunnak thazang in nun hram thawk kha a si.

Pathian riantuan ning cu chunglei kan thlarau in a thawk i thinglung ah, thinlung in taksa ah, taksak in a lenglei ah a dot dot tein a kal. A lenglei thil thluachuahnak Pathian hmai ah a biapi lo bik mi hi zumtu tampi nih kan hal a tam bik ko lo maw? Kan ral pa Satan cu lenglei in chunglei ah luh in rian a tuan. A chung bik ah a ummi minung thlarau cu Pathian nih hmuh khawh lo mi ralhruang in a ven caah Satan nih tonghnak nawl a ngei lo. Zeicatiah..

Sertu Pathian caah minung kan thlarau cu nambar one a si. Ser hmasa mi zong kan thlarau a si. Thluachuah a pek hmasa mi zong kan thlarau a si. Amah muisam a kengmi zong kan thlarau a si. Pathian nih um a duhnak hmun zong kan thlarau chungah a si. Krih cu zumtu thlarau chungah a um i cutikah Krih thlarau le minung thlarau cu nunnak pakhat an i hrawm. Cu chungin a chuakmi nunnak kha Krih nun kan timi cu a si. Nihin cu Sunday a si caah ka duh duh ka tial ve ko hih. Dr.Pari