Dr.Pari Nih US Politics Ah Nihin Nitiang A Phi An Chuah Khawh Lomi Fiang Taktak In A Vun Fianter A Mak Lawlaw

Pro-Choice maw na si? Pro-Life dah?

Next video cu nuta pata damnak kong a si lai. Cu ka chim hlan ah Pro-Choice le Pro-Life kong biasawng kan tlorh pi ta hna. Hi kong hi US politics ah nihin tiang debate an tuah peng nain a phi an chuah khawh lo mi (controversial issue) a si. Zumtu pakhat dirhmun in nang zei lei kap dah na zumhnak a hoih deuh?

Pro-Choice
Nu pakhat nih ka takpum kong cu keimah kut lawngah a um. Cucaah ka paw in ka pawimi nau cu aa semka mi a si zongah keimah nawl in ( hrawh ka duh ahcun) ka hrawh khawh, cozah le phunglam nih hi kongah nawl an ka ngeih awk a si lo timi zumhnak cu Pro-Choice ti a si. Hlan ahcun Anti-life tiah an ti. Nain Anti-timi cu negative biafak deuh a si caah hnu ahcun an hmang tuk ti lo.

Pro-Life
Nu paw chung i aa semka mi nau cu minung pakhat a si. Cucaah minung nih a ngeihmi covo a si mi nunnak cu aa semka mi nau poah nih an ngei timi zumhnak cu Pro-life ti a si.

Hi zumhnak nih a chuah pi chap mi cu mah le mah i thah, thih dantatnak pek, damh khawh ti lo mi mizaw kha a fah a tuar tuk sual ai kun tiah fah lo nak sii pek i thah (Euthanasia), minung bantuk a lem ser (cloning), aa semka mi nau cell kha thil hlathlainak caah hman (Human embryonic stem cell research) tbt tiang kha a doh chih. Hi zumhnak a ngeimi hna nih cun aa sem cang mi nau hrawh cu a duh in an duh lo.

Hi zumhnak pahnih hi ti le mei, a rang le a nak bantukin an i kalh maw?
A tak ahcun Pro-Choice le Pro-Life hi pehtlainak an ngei ko. Hi zumhnak pahnih karlak pakhat khat ahcun kan um dih hna. Mi pakhat a zumhnak hi Pro-Choice maw Pro-Life dah timi fek tein chim a har ngai. Khuaika lei dah a naih deuh timi lawng hi chim khawh dawh a si. Dirhmun pakhat khat cungah hngatchan in a zumhnak ai thlen khawh caah.

Bianabia (1)-Mi nu pakhat nih nau hlatnak ningcang a theih ko. Nau hlatnak sii zong phung ning tein a cawk khawh ko. Sii a hman tikah sii nih a pum harnak a pe lo nain a hmang lo. Nau a pawi hnu ah a hrawh.
Cu bantuk cu voikhat zong a si lo. A voi a tam tik ahcun amah le amah Pro-Choice ka si tiah a ti mi zong nih cu bantuk cu ka si awk a si lo. Nau hlatnak lam hi tha tein kan hman awk a si. Nau hrawh hi kan hrial awk a si tiah a chim cang. Cutikah Pro-Choice a zummi cu Pro-Choice a si ti maw?

Bianabia (2)- Minu pakhat cu lung zawtnak zual a ngei. Doctor te nih nau ngeih lo dingin ruahnak an pek. Nau ngeihlo nak lam zong a hmang ko nain ruahlo piin nau a pawi sual. Cu minu i a lung nih amah le a pawimi fa caah rian a tuan kho ti lo. A caah tih a nung cang. Minu a thih ahcun a pawimi fa zong a thi ve cang lai. Cutik ahcun Pro-Life tiah amah le amah ai timi minu nih cun a pawimi nau hrawh dingin a chim cang. Cucu Pro-Life a zummi ti khawh a si lai maw? Na zumhning vun langhter ve. Credit:Dr.Pari