Kan theih bantukin nihin ah ralkap nih uknak- aa-na an tin tikah kawlram chung um mi lawng si loin vawleicung kawlram mi vialte le ramdang leiin zeimawzat nih ralkap thil tuahmi cungah an lungtlinglonak an langhter cio. A bikin ram ngeitu kan ca ko ahhin lung a faakin ruahnak a pit bak khi si ko.

Nihin ah ralkap nih uknak an lak le cang ka in Chin Ramkulh Cozah Cabinet hna cu zong Hakha Ralkap nih an tlaih hna i pali an thlah hna tiah kan theih. Hi kong ah Minister Pu Sui Thio nih “Zanlei 3:00 ah khan an kan thlah. Keimah, Minister Pu Vui Kaw, Minister Pu Mang Hen Dal le Minister Pu Pau Lun Min Thang an kan thlah,” tiah zaan 8:15 ah a chim.

A taang rih mi kong he pehtlai in Pu Sui Thio nih “Chief Minister Pu Lian Luai, Hluttaw Speaker Pu Zo Bawi, Minister Pu Phwe Ar le Minister Pu Soe Htet tu cu an taang rih,” tiah a chim.An auh hnanak le an thlah than hnanak kong he pehtlai in Minister Pu Sui Thio nih “An rak chim mi nan theih cio bang khan 2020 thimnak ah mee ningcang lo a um ti pawl kha a si ko. Cun an kan thlah ah hin ‘Dai tein va um u’ an kan ti i an kan thlah ko,” tiah Pu Sui Thio nih a chim. Chief Minister telh in a taang rih mi hna cu zeitik ah an thlah te hna lai ti cu theih a si rih lo tiah thawng theih a si.

Hi kong pe pehtlaiin Thantlang le Hakha nih kan i bochan taktak mi Dr. Hmuh Thang le Pu Siang Lian Hmung cu Ralkap nih Uknak an laknak kong he pehtlai in an laknak a ruang cu Dr. Hmuh Thang le Pu Siang Lian Hmung kha Biaruahnak kan tuahpiak hna ulaw a ttha,” tiah mipi sin in biahalnak a tlawm ti lo. A ruang cu”Dr. Hmuh Thang le Pu Siang Lian Hmung hi ralkap party simi (USDP) aa cuhmi an si ruangah atu bantukin biahalnak an tuahmi hi a si bik. Ramchung rinhchanmi Media hna zong nih mipi nih an halmi kongah ttuanvo kan lakpiak kho hna sehlaw a tthatuk hnga.