Vote For Dr. Hmuh Thang In 2020 Election. Tutan 2020 thimnak i candidate tarlangh mi vialte lakah party mit in siloin pumpak cun Dr. Hmuh Thang hi fim thiamnak leiah siseh, dinfelnak leiah siseh, a tonmi thil ah siseh, aa tlak bik tiah ka ruah. Cun uar a um khunnak cu principle a ngei. A hman tiah a ruahmi kha fekthup in aa tlaih.

Politics ahcun hawikom zong kha a hnu ahcun ral ah an cang i ral zong kha hawikom thar ah an i ser than tawn ko. Tulio dirhmun cun NLD le USDP hi kawlram party lakah a thawng bik an si. Hmailei zeimawzat tiang an si rih ko lai. NLD hi an pi Suh a um lo caan a phak tikah zeidah an va lawh te lai chim a har. USDP zong thangthar mino deuh nih an vun chawn hna caan a phak tikah zeidah an lawh lai kan chim kho lo. Tlangcung mi party he fonh in cozah dirh caan zong va phan te seh law chim khawh a si lo.

Cucaah Dr. Hmuh Thang nih aa tlaihmi USDP hi ralkap hrinthlak an si timi mit pakhat rumro in kan zoh piakmi hi a hman thlu kho lai lo. Dr. Hmuh Thang cu abikin Thantlang peng kan caah cun kan “HERO” a si. Taksa damnak a zohkhenhtu kan “FATHER” a si. Van sang au in kan rak um lio hnulei tuanbia kha philh hlah u si. Tukum hi politics chung i aa telnak a donghnak a si cang lai.

Amah zong taksa he a nung mi minung a si ve caah ni khatkhat caan khat khat ahcun vawlei a kal tak ve te lai. Cutikah a kong tha chim aa timmi vialte nih a kan dawtnak chamnak ding caah ngaih chih loin Vote For Dr. Hmuh Thang!

Political party cu cozah a tuan lio mi party sawisel kha an rian a si. Mipi thatnak nakin anmah power ngah kha a bia pi ah an chiah. Culakah a poi khun mi cu cozah an ser hnu president, chief minister tbt an si tikah cun rammi vialte aiawh in rian tuan ding a si nain anmah party aiawh in rian tuanmi an tam rih. Cucaah zei bantuk political party hmanh hi kan hmuhning le ruahning a tlinhmi an um lo. Nain rammi nih ram cungah tuanvo kan ngeihmi rian cu “VOTE” pek tlolh lo hi a si.

Tulio politics kan thlihran cun zei party hmanh vote law an tuanmi result na hmuh tikah na lungtling bal lai lo. A minung candidate zoh in vote hi zaang a dam bik lai. A minung candidate thim a thiam mi Party kha va tling te ko hna seh. Dr. Hmuh Thang hi tarlangh cia mi candidate vialte lakah ai tlak bak tiah ka ruah. 2020 thimnak Dr. Hmuh Thang hi vote cio hna u si.

Note: Politics ah kaa tel lo caah tanh hleimi party ka ngei lo. Cucaah a minung lawng ka zoh.
Caṭialtu: Salai Tin Maung Win