2021 February 1 zingka ah Ralkap nih nawlngeihnak an lak mi kong he pehtlain in Chin Ramkulh Ramkheel party 2 chungin upa Pu No Than Kap le Dr. Hmuh Thang nih February 2, The Hakha Times ah an hmuhning an chimmi kan rak taar chin.

Hi kong ah CNLD Party Chairman Pu No Than Kap nih, “Keimah pumpak hmuhnak ahcun Union Election Commission (UEC) nih thimnak an tuah lio ah ralkap nih nawlngeihnak la cang ko u, ti tluk in rian an tuan, tiah ka ruah. Phundang cun, hi thil a can ding hi UEC nih lam an sialcia bantuk a si. Ralkap nih siseh, USDP le party dang nih report zong an tuah lengmang ko hna khah. A fawinak cun, UEC nih an i palh rumro ko,” tiah The Hakha Times ah a chim.

Hi kong ah Chin Ramkulh USDP party Chairman le atulio Hluttaw Palai Dr. Hmuh Thang nih, “Hi nawlngeihnak an lak mi kong hi kei cu a ruah awk ka hngal bak lo. Cheukhat nih cun, USDP le Ralkap hi aa khat in an kan ruah peng. Thil sual poh hi kanmah party an kan puh peng. Zeihmanh kan i pehtlaihnak a um lo i atu nawlngeihnak an lak mi kong zong zeihmanh kan thei lo,” tiah The Hakha Times ah a chim. Source: The Hakha Times

Thawngpang thar: Ralkap nih nawlngeihnak a lakmi konghe pehtlai in Karen miphun Party (phu) National Union Concerned Group (KNU Concerned Group) nih an lungtlin lonak cathanh an chuah i ralkap nih nawlgeihnak an lakmi cu mawhchiat hna in NLD zong phunghrampi a rem kho lo tiah a mawhchiat ve. Anmah tein uknak kan ser lai tiah cathanh an chuah hi a si.

“February 1 ah Ralkap nih nawlngeihnak an lak hihi November thla thimnak lio ah teinak a hmutu NLD party i nawlngeihnak ningcanglo in a chuhmi kannih KCG nih cun akn duh lo taktak, NLD zong 2008 phunghrampi rem dingin biakamh an tuah i 2012 kum thimnak lio ah thimnak an rak i cuh i 2015 ah teinak an hmu asinain phunghrampi an rem kho hlei lo,” tiah KNU Concerned Group nih an chim.

“Cun, tlangcungmi ralthuam tlai phu NCA zongah 2008 phunghrampi remh dingin caihmainak a um nain, kan hlawhtling ṭhiamṭhiam loh. Cucaah, 2008 phunghrampi cu hluttaw ah siseh NCA ah siseh remh khawh asi lo timi a fiang. Cu bantuk cun, ralkap nih nawlngeihnak an lakmi zong KNU nih kan duh lo.

“Cucaah Karen ramchung ahcun KNU nih kanmah phung le lam ukhruainak ning in mahte khuakhan lairelnak ngeih dingin lungtlinnak kan ngei. Cu hleiah Karen hriamtlai phu a simi, DKBA, KNU/KNLA, PC BEF tibantuk zong KNLA hriamtlai ah i fonh in kan ram kan kilven lai. Ralkap nih ningcang loin nawlngeihnak a lakmi cu mizapi cohlan loin doh ding le ralkap nih nawlngeihnak a lak mi hi zei bantuk phu hmanh nih rak cohlang hrimhrim hlah uh,”tiah forhfialnak ca an chuah hi a si.

NLD cu 2008 phunghram cu a cohlanglo nain remh khawh ding in 2012 le 2020 thimnak ah aa zuam. NCA rampumpi kahdaihnak minthut chirhchan in ramkheel kong ceihmainak in phunghram remh siseh timi zong a tlamtlinglo. NLD nih siseh NCA nih siseh 2008 phunghrammi an remh kho lo ti a fiang,” tiah an langhter chih. Ref: RFA

____

Copyright ©  Chin World News Evening