Dr.Aung Myint Thang ( Sawihmingthanga ) Nih Lai Bible Le Mizo Bible Nih Holh Theih Lo Tiin An Lehmi Khi A Dik Lo, Saya Hoi Cung Tum Lehmi Tu A Dik.

Sermon

LAI/MIZO BIBLE LE HOLHTHEIHLO

Image may contain: 1 person, standing

Dr.Aung Myint Thang ( Sawihmingthanga ) nih, ” lai Bible le Mizo Bible nih holhtheihlo tiin an lehmi hi an palh Saya Hoi Cung Tum a leh ning khi a dik, Greek bible ah holhtheihlo a um lo,” tiin, holhtheihlo tiin Bible a lettu hna cu nautat ngaiin a nihsawh hna.

Dr.Sui Lian Mang le a dang Bible thiam saya cheukhat hna zong nih, “Holhtheihlo si lo in holhdang, theih khawhmi holhtu a si,” tiin an tial cio. Tha tein in Bible a hlathlai vemi kan pa le Bible Dr hna nih,holhtheihlo a si lo,holhdang tu a si deuh an timi hi zeicahdah kan pale Bible lei Dr hna nih Holhtheihlo ti cun an kan lehpiak ve hnga.Lai le Mizo lawng si loin,King James le mirang Bible dang hna zong nih holhtheihlo tiin, ziah an leh ve hnga?

GR:GLOSSA/GLOSSAI ENG:TONGUE/TONGUES ( Greek: Glossa/Glossai English: Tongue/Tongues )

Greek in Glossa cu mirang in Tongue a si i Lai in ‘lei’ ti nak a si i ‘holh’ ti nak zong a si.
Jame.3:5,8 i uk khawh lomi Lei a ti mi khi mirang Bible in Tongue a si i Greek Bible cun Glossa a si. Lamkaltu.2:3 i Lei/leite nih a tongh hna a timi zong mirang nih Tongues a ti i Greek nih Glossai a ti.

Jame.3:5,8 i Lei/Tongue/Glossa cu minung tisa Lei a si i, Lamkaltu.2:3 i Glossai/Tongues/Lei cu THLARAU nih pekmi Lei thlarau Lei cu a si. THLARAU cu vancung in a rak tummi a si caah THLARAU peekmi Lei cu van lei a si i,van lei nih a holhmi holh cu thlarau holh, vanholh cu a si.

Lamkaltu.2:4 ah biapi bik i kan hmuhmi cu an duh paoh in an holh a ti lo, “THLARAU nih a holhter hna ning paohin an holh,” a ti. THLARAU nih a holhter hna ning paoh in an holh timi hi a biapicem mi cu a si.Holhtheihlo a va si ah theih khawhmi holh a va si ah, Haleluia au a va si ah, tisa lei nih siloin THLARAU lei nih holhter ning paoh i chimphuan/sak cu biapi cu a si.Cucu van holh, thlarau holh,holh theih lo cu a si.

BIBLE AN LEH NING

1. Lamkaltu.2:4 Greek: Heterais glossai-Mirang: Other tongues-Lai: Holh dang-Mizo: Tawng dang Hoi Cung Tum: Holh dang

2. Lamkaltu.10:46-Greek: Glossai-Mirang: Tongues-Lai: Holhtheihlo-Mizo: Tawng hriat loh
Hoi Cung Tum: Holh phunphun

3. Lamkaltu.19:6-Greek: Glossai-Mirang:Tongues-Lai: Holh theih lo-Mizo: Tawng hriat loh
Hoi Cung Tum: Holh dang

4. Marka.16:17-Greek: Kainais glossai-Mirang: New tongues-Lai: Holh theih lo-Mizo: Tawng tharHoi Cung Tum: Holh thar a phunphun

Pakhatnak, Lamkaltu.2:4 Greek bible ah Heterais Glossai a ti i Heterais cu mirang in Other a si i Lai cun a dang ti nak si. Heterais – Other – A dang Glossai. – Tongues – Holh

Pahnihnak le pathumnak, Lamkaltu.10:46 le Lamkaltu.19:6 ahkhin, Greek Bible le mirang Bible zong ah Heterais le Other biafang hi a um ti lo i Glossai le Tongues ti lawng hi a um cang.

Cucaah, Lamkaltu.10:46 le Lamkaltu.19:6 hna hi holh dang tiin leh khawh a si lo.Tluang tlam tein, Lai le Mizo nih Holh theih lo, tawng hriat loh tiah an leh mi hi a dikmi le a Bible nih a sawh bik mi cu a si i holh dang tiin leh cu tinhcia ngei tein Bible an merh mi tu a si.NIV zong nih tinhcia ngei tein Job.1:6 i PATHIAN fapa hna timi kha vancungmi tiin an merh bantuk a si. Mirang bible cheu le bang nihcun another Language, Foreign language tibantuk in Tongues/glossai cu an merh len ve.

Palinak, Marka.16:17 ahhin Greek in Kainais, mirangin New, Lai in Thar ti nak a si.
Greek in Kainais glossai cu mirang nih New tongues a ti i, Lai Bible nih Holh theih lo tiin a kan leh piak.Hika i Holh thar timi hi Pentecost ni i vancung in an hmuhmi Lei thar/new tongues in an holh te lai a ti nak a si i holh theih lo tiin a kan lehpiak hi aa dawh tuk mi a si. Pentecost ni i an holh kha, THIANG THLARAU peekmi lei,van lei,thlarau lei thar,new tongue in an holh mi a si.

GLOSSAI/TONGUES IN HOLH CU

Kan Bible nih a chim duhmi Tongues/Glossai cu taksa lei nih a chimmi holh menmen si loin,
Vancung bak in peekmi, THIANG THLARAU peekmi lei/Tongue/glossa van lei,thlarau lei bak in an holh ti kha a chimmi cu a si caah, tisa lei nih a cawn ruang i a thiammi, English,
Aramic, Greek, Hebru le miphun dang holh i va holh memmem cu a si lo. Lamkaltu Pawl cu mivaak a si caah holh phun tampi a thiammi holh phun kha kan Bible nih Glossai/Tongues a timi a si hrim hrim lo. Lamkaltu.2:3 ah Lei/ Tongues/Glossai cu Van cung in a rungtummi THIANG THLARAU in an co ti kan hmuh.

Lamkaltu.10;46;19:6 zoh law, anmah duh in an holhmi a si lo, THIANG THLARAU in an holhmi a si i THIANG THLARAU nih amah nih a duhmi kha, Lei thar/new tongue/Kainais glossa, van lei, thlarau lei cu a peek mi hna nih,Van holh an holh tawn i van hla an sa tawn.

Holh theih lo phunhnih

1. Voikhat cu, apostol Lalcungnunga cu miphun dang sin thawngtha chim dingin a hun dir i
THIANG THLARAU nih Lei/tongue/glossa a peek i a holh thluahmah ko! An mah holh bak cun a holh thluahmah ko i holh leh piak a hau lo.Cu hna holh cu a thiam bal mi a si lo.Khuaruahhar in THIANG THLARAU a cawlcang i zumtu ah an i cang hna.

2. Zankhat cu thlacamnak inn ah keimah lawng ka it. Mangcang hlanin ka um i khuachia hriam phunphun aa put mi nih thah dingin ka ihnak inn cun an rak ka kulh dih. Ka hun i thang i ka hmuh ning tein ka hmuh peng ko hna. Holh theih, Lai holh in ka thawl hna i a cawl zong an cawl lo,a lau zong an lau lo i a hninh zong an i hnin lo.

THIANG THLARAU nih a rak ka pek cangmi Lei/Tongue/Glossa in holh dingin THIANG THLARAU nih ka hngalhter i ka hun holh i holh theih lo cun ka hun thawl hna! A mak tuk ee! Dong hngal lo khur ah pakhat hnu pakhat a thlak thluahmah hna an i chang kho lo,an dihlak an tlak dih hlan lo holh theih lo cun ka holh i an dihlak tein,pakhat hmanh taang loin, donglo khur ah an tla dih.

Kan Lai Bible nih holh theih lo phun hnih hmannak a chim i Lamkaltu.2:4 i holh dang a ti khi Apostol Lalcungnunga nih a hmanmi holhtheihlo,midang nih an mah holh i an theihmi a si i, Lam.10:46;19:6 le Korin chung i holh cu, THIANG THLARAU nih Lei a pekmi hna nih Van lei thlarau lei in an holhmi Holhtheihlo cu an si.

DONGHNAK

Holh theih lo ka ngeih hlan ah PATHIAN ka cungah a lawm ko i, a rian tampi ka tuan khawh ko.THIANG THLARAU nih Lei/Tongue/Glossa a ka pek caah holh theih lo laksawng ka ngeih hnu tu ahcun thlarau hriam tam deuh ka ngei ti nak si. THIANG THLARAU nih peekmi lei in,THLARAU Hruai ningin van holh,thlarau holh in thla an cam i PATHIAN Zaangfahnak an hmuh i luatnak le Lawmhnak an hmuh.

THIANG THLARAU peekmi lei in,THLARAU hruai ningin van hla, thlarau hla an sak tikah,PATHIAN mi ( THLARAU mi) tampi sual temtawnnak le khuachia temtawn nak in an luat i an sifah ruang le an retheih ruang i an lungretheihnak thilrit hna in luatnak an hmu i dam lo tampi nih damnak zong an hmuh. Tisa hna in siloin thlarau hna in a ngaitu hna caahcun,THIANG THLARAU peek lei in hla an sak mi le tisa lei in hla an sak mi hna cu ol tein thleidan khawh a si ko.

Catialtu: Tluang Lian (Martar)

Leave a Reply