Dr. Aung Myint Thang Nih Holhtheihlo A Ti Nain Rev. Hoi Cung Tum Nih Cun Holh Dang Tiah A Hman-Video
Atu lio Chinmi nih Online chungah kan buaipi ngaimi cu holhtheihlo kong a si. Dr. Aung Myint Thang nih holhtheihlo a um lonak kong he tiah a aupi chih ve i a cheukhat nih a umnak an aupi chih ve. Laimi nih kan ibochan bakmi Rev. Hoi Cung Tum nih cun holhtheihlo ti loin holh dang tiah a hman i ahmaan ngai tiah ka ruah ve. Dr. Aung Myint Thang a ttialmi rel le ngaih khawh a si. Cun Rev. Hoi Cung Tum nih a chimmi ngaih khawh a si.
HOLHTHEIHLO KONG AH LAIMI KAN SAYA TE DIRHMUN: Ka kum hi kum 48 asi. Family ka dirhnak hi kum 15 asi. Pathian rian ka ttuan kum hi kum 30 asi. Baibal siangin ka tuah kum hi kum 15 asi. Holhtheihlo ka doh kum hi kum thum lawng asi rih. Cuhlan cu kan zoh ziar hna. Nai hrawng cu chun he zan he holhtheihlo lih asi ning cu Baibal in, hmuhtonnak in, theology in kan van phomh ciamman i holhtheihlo a uarmi cu cangcel nitlang lak i chiahmi nan lo ko. Hi holhtheihlo kong he pehtlai in kan Laimi Khrihfa lei kan lutlai pawl dirhmun ka hmuh ning ka van chim lai.
Gruop (1) Holhtheihlo a pom mi hruaitu hna: Holhtheihlo lih asinak le Greek Baibal i a um lonak kong cu kan chim lengmang. Keimah lawng hmanh ka si lo i keimah nak hmanhin Youtube le adang Internet website i kal ahcun lih asinak kong hi mirang nih an chim deuh i an ttial deuh. Asinain Israelmi sui cawfa hmai i an rak rock bantukin holhtheihlo hla i i sak i rock hi an maa hlei lo. Hiti pumpaak bak i a holhtheihlo hla a sami pawl khi Baibal siangin a kai bal lomi, an kai hmanh ah broken English lawng a thiammi, cawnnak reprapa ngei lomi, misual piangthar ka, mi nawl ai cawn chommi, nihin ah a piang thar hi a thaizing i phungchim i ai thawh cawlhmi, hawi hmuh a hmu ve lomi, hawi thei a thei ve lomi, English Bible hmanh ai leh khawh lomi, Biael awk zong a tlak lomi, mi nal sawhsawh khi an si dih.
Group (2) Holhtheihlo a pom lo nain a member a pommi hna ttih ruang ah ai pom termi: Cheukhat kan biaknak lei lutlai hna cu holhtheihlo hi an pom bak lo. An zumhnak (theology) he pehtlai in an pom bak lo pinah an cawlcangh ning (an movement) kha an duh lo. An fih. Asinain an member tampi hna nih bu dang holhtheihlo kha an vai zoh i a ttha tuk le a nuam tuk in an ruah tikah an member kha an ttih hna i a member duhning lawngte in um piak khawh kha an i zuam. An member duhning kha zulh khawh an i zuam. Anmah i an laam ve an sak ve lo hmanh ah an sawisel ngam ti lo. kan Khrihfabu a kuai sual lai ti an phang. Pathian mihmai le Baibal mihmai zoh loin cawnnak a ngeilomi an member hna duhning in Khrihfabu a hruaimi an si. Evangelist cheukhat zong holhtheihlo cu an pom lo nain ka doh ahcun phungchim ka tong ti sual lai lo ti a phang i ai pom termi mi depde evangelist an tampi.
Group (3) Holhtheihlo a rak pom ko nain atu ahcun a pom tilo nain, “atu cu ka pom ti lo” tiah chim ai nautatmi hruaitu: Hruaitu cheukhat hna cu ahlan ah holhtheihlo kan rak ngei tiah an rak chim. Asinain ca tampi kan ttialmi le midang ttialmi an van rel ve tikah holhtheihlo Baibal i a um lo zia le kan lai Baibal ah holhtheihlo timi biafang hi an hman palhmi biafang asi zia kha an van i fiang. Asinain holhtheihlo cu lih asi ti kha a chim a ning a zak cang i an duh na loin an i pom ter chih. An member nih lih i holhtheihlo hla an sak i an tur len zongah lungsau in in khawh an I zuam.
Group (4) Holhtheihlo kong ahcun an duh poh in um cio ko hna seh a timi hruaitu: Acheukhat hruaitu cu Jericoh lam i mifir nih an thah hrulhmi phungbia cawnpiaktu le Farasi hna nih an lanh taak bantuk khan zankhuadei holhtheihlo i lih i a tur zong ah chimrel ai tim lomi, kan ram hi Baibal lo ning i an kal cuahmah ko zongah a poi ah a chia lomi, holhtheihlo timi hi a dik hnga maw dik lo hme ti zong theih ai tim lomi, kan Khrihfabu hi a ngan a dam maw dam lo hme ti zong theih an tim lomi an si.
Group (5) Holhtheihlo a domi hruaitu: Hi group mi hna nihcun Greek Baibal ah holhtheihlo timi biafang a um lo kha an hmuh. Greek Baibal cu mirang holh in an leh cio tikah King James nih “theihlo (unknown)” timi biafang hi a chap i cu thawk cun holhtheihlo timi hi King James Baibal ah a hung um ti kha an lung a piang. Pentecostal Khrihfa hna nih holhtheihlo cu Baibal ah a um taktakmi ah an ruah i tinco khawh an i zuam nain an tinco lo caah anmah nih lih in an chim i cucu holhtheihlo asi tiah an ti kha an lung a piang. Cucaah hi group minung hna nihcun mi mihmai zoh lo in chun he zan he an doh. Biatak an ttanh i lih an doh. Asinain lih a zul cangmi hna nih an duh lo. Asinain an doh chih. Dr. Aung Myint Thang