Dr. Aung Myint Thang: Laitlang Ah Thlarau In A Khat Mi Na Si Khawhnak Dingah Cun Na Rum Hmasa A Hau

Chin News

LAI TLANG AH THLARAU IN AKHATMI AH RUAH NA SI NAK HNGA

Image result for aung myint thang

1. Lai Tlang ah Thiang Thlarau in akhatmi ah rel na si nak hnga caah cun phung na chim lai ah “Halleluiah” tiin voi (7) na au pi hna a herh. Voi sarih na au pi khawh hna lo zongah voi thum tal cu na au pi hna a herh. Halleluiah ti a chim tam mi poh hi Thlkarau lei kar a hlang kho mi ah chiah an si. Jesuh, Mary, Stephen, Baptisma petu Johan, Paul le Peter te hna an au cu kan thei bal lo nain Lai Tlang ahcun na au hrimhrim a hau. Halleuluiah ti i na au lengmang lo ahcun Thiang Thlarau nih umpi lomi le Thiang Thlarau rianttuannak a pom lomi ah an in rel lai.

2. ZBC hla cauk hi na hrial lai, na kal taak cang lai i tuchan solo sak ding i an phuahmi, hlaremh sak awk zongah a ttha lomi, a phuahtu zong kan theih tthittha lomi, kha mi zaapi cu na sak pi hna lai. Kan pipu chan in an rak sakmi ZBC hla na sakpi hna ahcun rivival a tla kho lai lo tiah chanthar Laimi evangelist nih an zumh cang caah ZBC hla cauk cu an kal taak cangmi a si. ZBC hla an sak nak crusade hmun ahcun Thiang Thlarau ai phuang ti lo ti tluk in an zumh cang. ZBC hla cu Pathian Thiang Thlarau ai phuannak caah dawntu bantukah ruah a si cang.

3. Lai Tlang i Thlarau i khah cu pumhnak chung lawng i langhter hi thil bia ah an chiah. Thiang Thlarau umpi mi an sinak zong hi pumhnak chung lawngah hmuh khawhmi an si deut ngawt. Laimi Thiang Thlarau in khah cu pumhnak chung i tlik kha asi. Cucaah mipi kha na tlikpi hna lai. Na tlik pi hna lo ahcun kan nun a car tuk an ti lai. Ai pummi zong an zor chin lengmang lai.

4. Lai Tlang Thiang Thlarau nih a duhbik mi cu disco music le rock music kha a si. Hla nan sak tikah keyboard kha disco music le rock music style bak i na tum lo ahcun mipi kha mi hmai ah an tli kho ti lai lo i Thiang Thlarau in an khat kho lai lo.

5. “Bwipa nih thluachuah in pe ko hna seh” ti kha na chim lengmang lai. Na thinlung chung i a um taktakmi asi lo zongah na chim lengmang lai. Laimi evangelist pakhat cu “Bawipa nih thluachuah in pe ko hna seh tihi voikhat sermon ah voi 70 hrawng a chim caah Thiang Thlarau in a khat taktakmi dawtnak in a nun a liammi ah an ruah.

6. Lai Tlang i Thlarau i a khatmi na sinak ding ca ahcun awka nemtein nai holh ter lai. Jesuh nih Pharasee a phomh hna bantuk khan na phomh hna lai lo.

7. Lai Tlang i Thlarau in na khah nak ding caah cun rum a herh fawn. Mi sifaak cu Thiang Thlarau in an khah ko zongah an zum hna lo. Mirum lawnglawng kha Thiang Thlarau in kan khat an tiah an zumh hna.

Leave a Reply