Dr. Aung Myint Thang nih Prophet, holh theihlo le hngalhnak hna cu an dong cang tiah a chim mi kongah a tanglei bantukin Rev. Benjamin Khamh Bawi nih fiang ko in lehnak a pek. Zei hi dah kan zumh kun lai?

Rev. Benjamin Khamh Bawi: A dong te lai,” tiah a palh kho lomi Baibal nih a chim komi, “A dong cang, a dih cang,” ticu phuahchom theory a si. Baibal chap le Baibal zuh a si. Phuahchom theory a si. Baibal Caang i tlaih ding a um lo. Ruahdamh le serchommi a si.

Dr. Aung Myint Thang: Paul chan lio ahcun Pathian nih minung ninung hmangin bia a rak i phuan rih caah a dong te lai a rak ti. Paul a thih hnu deuh ah Pathian i ai phuannak cu a van dong i Pathian phuannak bua tling Bible cu kan vun ngai. Paul chan ahcun future rense a rak si i kan caah cun past tense a si cang.

Rev. Benjamin Khamh Bawi: Sayakyi Dr Aung Myint Thang, nih na palhnak nganpi cu, “Paul nih Jesuh hmaitonh in a hmuh cang caah, a dih cang,” na ti tikah nangmah zong na thi ve cang i Hmaitonh tein Jesuh na hmuh ve cang tinak a si lai cu? Mah duhning in Baibal Merh le Kuaihpiak cu na ngamh a sang kho taktak. Biaceihnak na tuar dingmi khi ka ruah ah Zan Mang i Manh ding hmanh ah kai Nawl ngam lo aih! A tang hi Dr. Aung Myint Thang ttialmi hi si.

THLARAU THIL PEEK “HOLH” A DONGH CANG NING BAIBAL NIH FIANG TUKIN A CHIM: Thiang Thlarau thilpeek pakhat cu holh a si. Cucu Greek in “glossa” Mirang in “tongue” or “language” ti a si.

1. PROPHET BIAPHUAN A UM MAW? A DONG LAI. 1 Kor. 13: 8

Prophet hna nih bia an rak phuan cu Pathian nih minung hna kan caah a herhmi kha a rak phuan ter hna caah a si. Pathian nih minung hna kan caah a herh a timi vialte a kan chimh dih hnu ahcun Pathian nih prophet hna kha a hmang ti hna lo. Pathian nihcun minung hna chimh a kan duhmi cu vanmi, prophet, Jesuh le Lamkaltu hna hmangin a phuan dih cang i cucu cauk ah an ttial cang. Cu cauk cu Baibal a si. Bia. 22 ahcun Baibal cu chap khawh asi ti lonak kan hmuh. Zeicadah chap khawh a si ti lo? Prophet an um ti lo caah. Zeicadah prophet cu an um ti lo? Pathian nih a hman ti hna lo caah. Zeicadah a hman ti hna lo? Pathian nih Khrihfabu caah a herh a timi vialte cu a phuan dih cang i Baibal ah ttial a si cang caah a si. Cucaah Baibal zong chap khawh asi ti lo hnu i prophet ka si rih ai timi cu nal-prophet an si.

2. HOLH (AN I LEHPALHMI BAIBAL AHCUN HOLHTHEIHLO A TI) A UM MAW? A DONG LAI 1 Kor. 13: 8

Anmah holh a si lomi in holh khawhnak Pathian Thlarau nih a rak peek hna cu mi dang theih ding ah a ttha lomi le a herh lomi Pathian sin i biathup chim nak caah le zumlotu hna khuaruahhar ter i Jesuh zumh khawh nak caah Pathian Thlarau nih a rak peekmi holh a rak si. Hihi Pathian Thlarau ai phuannak pakhat a rak si ve. Asinain Pathian nih minung hna sin i a chimmi ai phuannak a maak i prophet hna an dih bantukin 1 Kor. 13: 9 ahcun a dih ve cang tiah a ti. Cucaah Thlarau Thiang nih a rak peekmi mah holh a si lomi in biachim khawh nak cu vawlei cungah ahohmanh nih an ngei kho ti lo. Aceu nih an holh ve hnik i Mirang holh hna a lo pah nain lih a si.

3. HNGALHNAK A NGEIMI NAN UM MAW? A DONG LAI (1Kor. 13: 8)

Hi hngalhnak hi minung nih thluak in kan hngalhmi hngalhnak kha a chimmi a si lo. Minung nih thluak in kan hngalhmi hngalhnak a dongh ahcun Pathian kan hngalh nak zong a dong ve hnga i Pathian zong hngal ti lo in kan um hnga. Hi Baibal ah a chimmi hngalhnak cu Thlarau nih hngalhnak peekmi kha a chimmi a si. Thlarau nih hngalhnak a rak peek hna caah hmailei ra dingmi zong an rak chim khawh i Baibal zong cu an rak ttial khawh. Asinain atu ahcun a tlingmi (Baibal, Pathian bia tling, Lamhruiatu) cu kan sin ah a phanh cang caah Pathian nih hngalhnak cu a kan peek ti lo caah Thlarau lei thil cu Baibal lawnglawng in hngalh khawh a si cang. Cucaah Pathian nih aw in a ka auh, a ka hngalh ter na ti ahcun na lih bak khi a si hnga.

4. PROPHET BIAPHUAN, HOLH LE HNGALHNAK CU A TLINGMI A RAT AH KHAN A DONG CANG 1 Kor. 13: 9

Baibal nih “a tlingmi” a rat in a dong ko lai a ti caah a tlingmi cu a ra i a dong cang. Hi a tlingmi atimi hi Jesuh a si lo. Pathian nih minung hna caah a herh a timi vialte ting tein ai phuan i, cu aiphuannak cu kan lam hrauitu ca i kan ngeih caan khi a chim chungmi a si.Pathian nih iphuannak le cawnpiaknak cu tlingtein a chim cang i cucu Baibal ah ttial a si cang. Atu ahcun Pathian nih Baibal in kan sinah bia a chim cang. Cucaah Pathian aw theih a duhmi poh nih Baibal cu ka rel tawn. Cucaah Pathian nihcun Baibal in mi kan cawnpiakmi lawng kha a duh cang.

5. ATLINGMI A RAT TIK HI JESUH RAT TIK A SI LO ZIA

1 Kor. 13: 8-9 ah a tlingmi a rat tik ahcun prophet biaphuan, holh le hngalhnak, hi phun thum lawng hi an dong lai a rak ti. Cucaah Jesuh rat tik khi a chimmi a si lo. Jesuh rat tik ahcun hi phun thum lawnghi a dong ding an si lo. Jesuh rat tik ahcun Khrihfabu rianttuannak vialte hi a dong dih lai. Phun thum lawng a dong lai lo. Phungchim a dong lai. Thawhlawmpeek a dong lai. Cheuhra cheukhat peek a dong lai. Healing a dong lai. Zumlotu Baibal ca chimh a dong lai. Mission a dong lai. Rammui kal a dong lai. Pastor rian a dong lai. Evangelist rian zong a dong ko lai. A dong ding lawngte an si dih. Cucaah Jesuh rat tik khi cu a chim hrimhrim lo. A chim lo caah pei holh dang zong cun nan holh khawh lo cu! Prophet zong an um ti lo cu!

6. AMAH KHA HMAITONH IN KA HMUH TIK AHCUN TLINGTEIN KA HNGALH TE LAI (1kOR. 13: 12)

Hika Baibal cacang ruangah hin “a tlingmi” a timi hi Jesuh rat tik caan ah an chiah. Asinain Paul nih Jesuh hmaitonh in ahmuh caan cu Jesuh rat caan a si lo. Paul cu a thi cang i Jesuh cu hmaitonh in atu ah a ton cang. Asinain Jesuh cu a ra rih lo. Vancung kan kai tik i kan hngalhnak a tlamtlinnak tu kha a chimmi a si.

7. ZIAH PAUL NIH ATLINGMI A RAT TIKAH A TI KO TTUNG? HMAILEI CAAN PEI A CHIM KO HI!

Paul chan lio ahcun Pathian nih minung hna sin i ai phuannak hi a donghter rih lo. Vanmi zong a hman rih, aw zong a hman rih, Asinain paula thih hnu ah, AD 100, a tlin hlan ah Pathian nih minung hna sin i chim a duhmi le hmuhsak a duhmi vialte cu tling khitkhet in a phuan dih. Cucu cauk in lamkaltu hna nih an ttial i Baibal a si. paul chan ahcun Baibal an rak ttial lio a rak si. kan nih chan ahcun Baibal ttial khawh a si ti lo. Paul caah cun atlingmi a rak kha future tense (hmailei thil) a si. Kannih caah cun past tense ( a luanciami caan) a hung si.

Cucaah vanmi zong nan hmu ti hna lai lo. Prophet zong nan thei ti hna lai lo. Pathian zong nih hngalhnak zong an pe ti hna lai lo. baibal lawnglawng in hmailei i a rami cu na hngalh khawh cang lai. Aw zong na thei ti lai lo. Larnak zong na hmu ti lai lo. Pathian nih an chawnh ahcun prophet na si rih hnga.