RAM LE UKNAK KONG AH BIAHALNAK

Political Questions in Myanmar Context: 1. Atu lio miphun an kan rel ning ah, Myanmar ah miphun, phun 135 kan um ti a si. Cutikah kanmah kan miphun zawn cio lawng kan i ruah hna i, kanmah kan miphun ca cio lawng i kan dir i, kanmah kan miphun cio ca lawng i rian kan ttuan i, miphun dang kha kan doh hna ahmaw kan ram ah dawtnak, daihnak, remnak le tthanchonnak hi a chuah khawh deuh hnga, asi loah kanmah kan miphun lawng ttanh lo in miphun dang he remnak le daihnak in rian kan ttuan tti ah dah kan ram ah dawtnak, daihnak le tthanchonak cu a karh deuh hnga?

2.Kan ram ahhin Khrihfa, Buddhist, Hindu, Muslim biaknak an um dih. Chinese biaknak le Sikh biaknak zong an um ve. Chinram cu Khrihfa ram a si ngawt. Bama pawl umnak ram cu Buddhist ram a si ngawt ve. Cutikah Chinmi nih Kawl miphun umnak khua (Yangon tibantuk) i biakin zong sak bak lo, Baibal siangin zong tuah bak lo i, cun Chinram zongah Budhhist i pura (pagoda) sak ter bak ve lo ah maw Pathian hi ai lawmh deuh hnga? Asi loah Kawlpawl lak i biakin zong sak ve ko i Chinram i a ummi Buddhist nih Chin ram i pura (pagoda) zong sak ve ah dah? Cu a zei deuh nihdah kan ram ah daihnak, remnak le tthanchonak a chuahpi deuh hnga?

3.Atu kan Kawlram hmun tampi ah ral a tho, Kachin Ram, Shian Ram le Rakhine Ram etc. Ral tuk i miphun pakhat le pakhat i thahnak nih maw kan ram caah daihnak le tthanchonak a chuahpi deuh hnga, asi loah dainak nih dah ram tthanchonak a chuahpi deuh hnga?

4.Thlangcung mi vialte nih mah party cio ngeih dih i mah miphun ca cio lawng i dir ahmaw kan ram caah a tthat deuh hnga, union i a ummi mipun vialte ca i dirhmi party pawl i kan i fawnh cio, kan i fut cio ahdah kan ram caah daihnak a um deuh hnga?

5. Atu lio kan ram sining ahcun Ralkap nih anmah ralkap le palik (police department) hi an ukmi a si. Mipi cu palik le ralkap kan si hna lo tikah ralkap nih an kan uk ti lo kan ti kho hna hnga maw? Ralkap nihcun anmah ralkap le palik lawng pei an uk ko cang hna cu, Ministry of Home Affairs le Ministry of Defense lawngpei an tlaih ko cu. Cucaah mipi cu thimmi party cozah a ttuan liomi nih a kan ukmi kan si ko cang, ralkap nih an kan uk ti lo kan ti kho hnga maw? Kan ti khawh lo ah zeitindah ralkap nih an kan uk rih ning a si? These are very polite questions. Unfair comments will result in permanent blocking

Dr. Aung Myint Thang