CORONA VIRUS HI PATHIAN DANTATNAK ASI HNGA MAW? Khrihfa 100 ah 50 renglo kan si ati nain 2% hmanh ai pum lomi, vawlei rumnak le fimnak lawng a kawlmi Australia cu nain ah thla hnih cung an ram he, an satil he an minung he mei in rawh an si cu kan theih dih. An ram hi acre 25.5 million bak a kang. In 3000 a kang. 33 an thi. Saram hi billion in an thi ve. Phaisa hi mei hmih nak caah le isersiamnak caah billion bakin an dih ttan. Atu vawlei nih corona virus kan ruah kan i hngilh kho ti lo.

1. CHINA: China ahcun missionary vialte an tthawl dih hna. Missionary luh khawh asi ti lo. Minung pakhat kha “Jesuh nih an dawt” ti chimh sual ahcun US$ 5000 dantat asi tiah Korea missionary nih an ka chimh. Atu ahcun corona nih minung 3000 leng a thah ve cang hna. Zawtnak a ngeimi 80,000 renglo an um rih.

2. KOREA: Korea hi thlarau lei le zumhnak lei ahcun uar an um bak. Asinain corona virus zawtnak a ngeimi hi 7000 hrawng an si i culakah 5000 renglo hi Taegu khua ah an um. Taegu khua hmanh ahcun Shinconji Khrihfabu chung minung, member kha an si bik. Hi Khrihfabu hi member 120,000 hrawng an um. Hi Khrihfabu hi cawnpiaknak hmanlo a zulmi an si i an founder pa, Man Hee Lee hi Jesuh nih fimchimtu kan thlah piak hna lai atimi hi Thiang Thlarau asi lo, kan pastor pa hi asi tiah a zummi an si. Vancung kai dingmi hi 144000 lawng kan si lai i kanmah Khrihfabu lawng kan si lai an ti. Kesuh nih a nawlngeihnak vialte cu mi dang sinah a pe lo, kan pastor sinah a peek atimi church an si.

3. IRAN: Iran ahhin corona zawtnak a ngeimi hi 6000 leng kai lawng an si nain a thimi hi 140 hrawng an si ve cang. Iran hi USA le Israel lunretheihnak a pe cemtu asi. Saudi Arabia zong hnahnawhnak a pe biktu asi. Israel i an ral Hamas pawl le Syrian Asad a lor ter biku ram zong asi.

4. ITALY: Italy ahhin 7000 renglo nih an ngeih ve i Europe ah a tam bik nak hmun asi ve. 300 renlo an thi ve cang. Italy a sualnak hi cu ka thei lo. Biaknak lei ah ai pe ngaimi RC center asi.

Vawlei cung minung cu misual dih kan si ko. Pathian sinah zaangfah nawl i a sin i panh hi kan i ven khawh biknak lam asi ko. Kannih kan Kawlram le kan laimi zong nihin ni tiang kan himmi hi Pathian khuaruahhar thil tuahmi asi. Credit: Dr. Aung Myint Thang