KHRIHFA MIHRUT: 1. Mihrut cu siangin kai i degree laak khawh kha an i zuam. Asinain degree an laakmi he a kal ttimi fimthiamnak kha an laa duh lo. Degree laak lawng kha an i tim i fimthiamnak tu kha cu an i laak lo. Cucaah mifimhrut ah an i cang. 2. Mihrut cu Baibal kan cawng an ti i a Baibal bak kha an cawn i Baibal nih a kan cawnpiakmi nuncan/ziaza le lungput tu kha cu an cawng duh lo. Cucaah Baibal thei ngai ttung i Pathian thei lomi ah an i cang.

3. Mihrut cu Jesuh nawl kan i cawn an ti i an Baibal siahngakchia le an member kha an ke an ttawl hna. Asinain an ke an ttawlmi hna tang ah khan an i dor taktak fawn hna lo. Ke ttawl nih a chim duhmi cu mahnak in a niam deuh mi hna sin i i tangdor kha a chim duhmi a si. Cucaah mi mithmuh lawng i ai tangdor mi ah an i cang. Aphungmen i mi tang i ai dormi ah an i cang.

4. Mihrut cu Pathian biak ah kan i pum an ti i an takpum lawnglawng ai pum i an thinlung le an tlarau cu ai pum lo. Pumh timi cu hawi he thinlung dihlak in Pathian biak le thangtthat kha a si. Cucaah biakin a panh ttung i Pathian a bia lomi ah an i cang.

5. Mihrut cu Pathian cungah kan i lawm tuk an ti i an laam. Asinain an laam chung lawng kha an i lawm i inn an ttin cun lungrethiehnak le vuivainak in an khat. “Laam uh” timi nih a chim duhmi cu Bawipa ah i lawm zungzal uh tihi a kan chimh duhmi a si. Laam ttung i Bawipa i nai lawmh zungzal ttung lo ahcun na laammi kha sullam a nei lo. Cucaah a laam nain a ngeih a chiami ah an i cang dih.

6. Mihrut cu tipil kan ing an ti. Tipil cu an ing nain Jesuh thihnak le thawhtthannak cu an i hrawm lo. Cacaah tipil a ing i khamhnak a co lomi ah nan i cang. 7. Mihrut cu Pathian rian kan ttuan an ti i Pathian nih a fialmi hna rian kha an ttuan lo. Cucaah Pathian rian ka ttuan ti ttung i mah rian a ttuanmi ngawt ai si ko. Cucaah kan Khrihfa siinak hi. Lo ah ka kal ti i lo lawng i va kal i lo rian va ttuan lo he ai dannak a um lo. Rev. Dr Aung Myant Thang