Trump: Coronavirus ruangah, Hmaizarh in cun US ah Mithi Kan Tam Chinchin Lai. A ra laimi ni le caan ah coronavirus in a thimi kan tam chinchin lai, tiin President Donald Trump nih American mipi bia a cah cang hna. Virus nih a tlunhmi mizaw pawl nih an herh rup in thawdawpnak seh cozah nih a damkhaanpiak kho hna lo, tiah mipi nih an thangchiat ngaingai hna. State governors pawl nih hin an herh leng tiangin an kan hal caah a si. Virus an tihtuk ruangah a hleihluat in an i cah cia hna le si, tiin Trump nih a leh hna.

Coronavirus in a zawmi US ah an tambik cang. 327,920 hi a zawmi an si cang i, minung 9,326 lenglo an thi cang. Mah le inn cio ah i erh dingin nawl an chuahmi va zulh len ko bu ah, minung 100,000 in 240,000 hrawng US lawngah an thi kho, tiin White House i mifimthiam pawl nih an tuaktan ning a si. Tih a nungtuk mi caan chungah kan lut cuahmah cang. Hi zatzat minung a thimi hi cuhlan ah a hmu zong kan hmu bal lo kho men. WWI asiloah WWII bantuk ah dah ti lo cun, tiah Trump nih a chim.

Kangmei He Ai Khat: Duh a nung lo bikmi pakhat ah a cangmi cu, New York ah nikhat lawng bakah minung 630 nunnak a liam. NY lawng bak i a thimi hi minung 4,159 an phan cang. A zawmi miluzat le bangin fingtlang cul in a lawngmi kangmei bangtuk in an karh, tiah NY governor Coumo nih a chim. Manhattan in Canada ramri tiang vuris nih a tlunh hna i, vawlei cung i a thimi minung 60,000 lakah a zualhmabik dirhmun an phan.

A zualhmat bik dirhmun kan phan deuh rih lo, a naih cu kan naih pah cang. Hi hnu ni 7 hrawng tan kan hau rih. Mizaw kan hmuh hmasabik in nihin tiangah ni 30 a si cang. Chan chan khat chung a raumi ko khi a lo e, tiin Coumo nih a chim. NY i a thimi hi US pumpi a thimi i cheuthum cheukhat tluk a si. Khuachung sizung le ruahchiahnak pawl cu an buaituk cang.

Zawtnak i chonh lai an phan ruangah, virus in a zawmi hna an chungkhar pawl nih cun an dawtmi hna cu an hnuh cah cuahmah bu zongah an va khinhram kho hna lo. Mithi an um le cangka, an chungkhar le cu a si khawh chun tuan in phone in thawng kan hei thanh hna, tiah NY Presbyterian sizung riantuantu nih an chim.

Nan chung le an thi e, tiin thawng cu kan thanh ko hna nain, ruak zoh belte kan senh hna lo tikah, cu ko cu tuar awk a tha lo. Cozah nih an bomhmi siai thlopnak le hmaihuh pawl zong cu a dih zuahmah cang. Cu lio ah cun, JFK airport ah Saturday ah khan thawdawpnak seh 1,000 cu China nih a vanlawng in a pek nalh hna.

An kan zuamhnawhmi hi a sunglawituk e, kan caah tamtuk thathnemnak a chuahpi hrimhrim lai, tiin Coumo nih a lunglomhnak a langhter. Cu ti thawdawpnak seh an hun kuat hna nak cu March 27 ah khan President Trump nih Chinese President Xi a hei chonh caah a si.

A donghnak ah cun, Inn ah hun i erh ziar ko ne u. Eidin dawr kal, asiloah doctor sin kal dah ti lo in cun, leng ah chuah lo dingin state in siseh, khuachung police nih siseh American mipi cu nawl an pek cio cang hna. Lockdown tuah a khua hnu ngaimi Florida le Texas hmanh nih a tu hi lockdown tuah hram an hun thok cuahmah cang ve.

NY ah cangmi zei a lawh ti kan theih ko cang. Cun mi tampi an thi, ti zong kan theih, tiin Florida mi US senator Rick Scott nih a chim. Virus a karh lo nak dingah a thabikmi lam cu mah le inn cio i i erh a si kha kan hngalh fawn cang. Nan inn in a lenglei ah maw chuak sual citcet hna lai cu ci, tiin Texas governor nih a chim.

Dide a ngei mi zong cu an um pah fukfak rih. Louisiana khuasa Pastor Tony Spell nih cun state nih lockdown an tuahpi pah chih in pumhnak voi 3 ka tuah thiamthiam lai, tiin a chim. A khrihfabu minung hi 1,000 an si i Baton Rouge ah a ummi a si.

Pathian nawlpekmi cu a Thawngthabia karhter hi a si caah, state nih dun le dan an chuahmi hi kan pah lai, tiah Reuters ah a chim.Louisiana hi US ah virus nih a denbiknak state ah ai tel ve cang. Minung 409 an thi cang. Credit: Chelsea Bawi