By Chelsea Bawi

Donald Trump Amualpho Ning Le Huat Ai Huah Ning Afak Chin Lengmang Cang. Zei Party hmanh a tanh lomi USA Daily Newspaper ngan bikmi USA Today nih a tial ning tein leh piak nan si https://www.google.com/amp/s/amp.usatoday.com/amp/5313842002

WASHINGTON — White House pawng i duhlonak a langhtertu pawl police nih tear gas in an then hna hnu ah St. John’s Episcopal Church Trump nih a palmi kongah The bishop of the Episcopal Diocese of Washington a thin a hung kho taktak.

Fiangpup in chim ko ning law: Judahmi le Khrihfami nih a thiangmi cauk ah kan i ngeihmi Bible cu i tlaih riangmang in Jesuh cawnpiaknak le kan khrihfabu hna nih kan dirpimi phung vialte he kalh in Trump nih bia a chim. Cu ti biachim a duh caah cun, biakinn tual hrawnghrang ah a ummi mipi then dingin tear gas hmang u, tiin police officers pawl nawl a pek hna. Ka thin a hung bak, tiah Bishop Mariann Edgar Budde nih CNN ah a chim.

Budde hi St. John’s telhchih in khrihfabu 80 a thihruaitu bishop of the Episcopal Diocese Washington a si. Nu lakah cun a mah lawng hi a tu bantuk dirhmun a phan kho hmasabikmi a si.

Monday zanlei khan Rose Garden ah Trump nih biachimnak a ngei i, phung ningtein a kalmi president si dingin le daitein duhlonak a langhtertu pawl dirpi ding tiangin bakamnak a tuah. A chim bang in cun, police pawl nih tear gas, khairiat kuanfang le taangphaw an i hman i White House pawngah a ummi Lafaytte Park in duhlonak a langhtertu pawl cu an thawl hna. Hi hna pawl hi Daitein duhlonak a langhtertu pawl an si.

DC ah 7pm cun curfew dingin nawl an chuah ko nain, Trump nih biachimnak a ngeih hlan deuh 6pm in police officers pawl nih mipi pawl an thawl dih hna. Cu tlawmpal in cun President cu a mithi lalaang pawl he St. John’s church lei ah cun an vung kal hna.

St. John’s church hi Lafayette Park ralchanh ah a ummi a si i, US president James Madison rii in khan president a si mi paoh nih a tlawmbik voikhat tal an i khomh cio nak biakinn a si. Cucaah “President hna i an biakinn” ti tiang zongin min an pek phah.

Biakinn lenglei i a dir lio ah Bible cu a hun i thlir i, “Hihi Bible a si” tiin thawnglatu pawl cu a hun chimh hna.

Biakinn tual i hman vai thlak duh ruang tuktak i daitein duhlonak a langhtertu pawl police thazaang hmangin a thawl dih mi hna kongah mipi an thin a hang tuk hringhran.

“Trump nih hmathlak a duh ruang ko ah cun maw daitein duhlonak a langhtertu minung a thongthong cu tear gas he cun an thawl ko hna?” tiin Obama i a communication director a si bal mi Dan Pfeiffer nih Twitter ah a tial.

“Kan biakinn basement a khaangtu pawl kha Sunday zaanlei i duhlonak a langhtertu lakah an i tel ti lo. Sunday zaanlei i duhlonak a langhtertu pawl cu daitein a ummi an si i, kan khrihfabu riantuantu lila zong nih dintii an phawt hna i anmah he zong thla an camti ko hna. A tubantuk in Trump a hun kan veh mi hi khuaruah lei a har,” tiah St. John church ah rian a tuan lio mi Rev. Robert Fisher nih a chim.

“Kan church ah a rak len lai le len lai lo zong ahohmanh nih kan thei lo. News ka zoh hnu lawng ah kan church a rak rat hi ka theih ceu a si,” tiah Bishop Budde nih a chim.

“St. John’s a rat lio ah hin thla zong a cam naisai lo…ram pumpi in kan tuarmi kan lungfahnak kong zong a chim fawn lo. A bikin, kan ram i miphundang pawl an riantuannak theihpinak um dingin le, kum 400 chung miphun thleidannak le vunrang pawl tanhkhunnak (white supremacy) donghter a herh ko cang, tiin mipi au aw zong a theihpiak kho hna lo. Mi thin hunter dingin President nih bia a chimmi vialte hi kannih Washington Diocese nih cun kan cohlang kho bak lo a si ko. Miphun thleidannak le police pawl an thatlonak ralchanh in duhlonak an langhtermi hi kannih nih cun kan dirpi bak. Tuzan i ka mit in ka hmuhmi hi a zumh hmanh kai zumh kho lo lei khi a si,” tiah Bishop Budde nih a chim.