Democrats Kehdak pawl nih President Trump a rian in phuahnak ding ‘impeachment’ an buaipi mi le zapi theih in biahalnak ‘hearing’ tuah an timhmi cu tuchun in an thawk cang. US diplomats 2; William Taylor le George Kent hi Democrats le Republicans lawmakers nih bia an hal veve hna. An bia hal cu ngaih a nuam bak nain zeipi khi a si lo.

Kehdak nih Trump a sual ko ti lei in chimter an timh hna. Vorhlei pawl nih Kehdah pawl thil buaipi ning a dik lo zia langhter an i zuam ve. Caan paam in American minung lungthin a cheuter chin tu men a si lai tiah a ruatmi tampi an um. Saipi hmanh Cenghria rual nih rawl zong ei thiam lo in an dawi peng hraat ahcun an seh khawh caan a um i President Trump zong hi ai veng cawk lo te sual hnga dek maw. Reuters

Trump cozah ‘Administration’ nih phung ning lo in US a lut i asylum a sawkmi cu rianṭuannak nawl pek ti lo ding in daan ser an timh tiah Reuters nih an ṭial. Hlan deuh zong ah, US ummi nih ramdang ummi chungle US i ra ding i auh tikah health insurance an ngeih lo ahcun visa pek lo ding in daan ser an timhmi kong an ṭial bal cang. Reuters

Kum 2012 lio i President Obama nih executive order hmang in DACA program ‘kum tling lo, phung ning lo i US ah luhpi mi ngakchia pawl chanh/vennak parokrem’ a sermi zong President Trump cozah nih dihter an timh. Nain, New York, California, le District of Columbia Federal judges nih an kham ‘block’ piak caah Supreme Court nih ceihpiak ding in an chuahpi. Zahan ‘Tuesday’ ah SC nih minute 80 chung an ceih. SC nih Trump duhmi hi an pompiak deuh te men lai ti an zumh, a ruang cu SC judge 9 ah 5 hi conservative minung deuh an si. Ref: The Chin Voice