Daw Aung San Suu Kyi COVID-19 Positive Asi Timi Thawng Vakvai A Chuak

State Counselor Daw Aung San Suu Kyi cu Forward Media Group timi Facebook page pakhat nih COVID-19 positive a si tiah thawng a thanh mi cung ah State Counselor zung nih fak piin a mawhchiat. “Lungre a kan theihpi tu mipi cungah kan i lawm. Daw Suu a ngan a dam ko” chimrelnak nawl ngeitu U Zaw Htay nih a chim.

Cu pin ah Daw Suu ai-awh ah minung an chiah timi zong thawng diklo a si tiah a chimchih. “ram hruaitu hna konglam diklo in thanhnak a chuah mi hi fak piin hmalak ding an si lai” tiah U Zaw Htay nih a chimchap.

Forward Media Group hi a hlan zong ah NLD party kong he pehtlai in thawng diklo a chuah lengmang tu an si i, tutan zong ah State Counselor damlonak kong ah Facebook ah thawng diklo an chuahter tiah theih a si-Chin Broadcasting Network|Source: 7Day Daily News

Tatmadaw Chungah Ralkap 45 Nih COVID-19 Rai An I Chawnhbarh

Thlaruk chung Myanmar ramkomh chung COVID-19 rai chawnhbarh nak ah September 19 tiang Tatmadaw ralkap chung in COVID-19 mizaw 45 an si cang tiah theih a si. Tatmadaw lei in chimrelnak nawl ngeitu Brigadier-General Zaw Min Tun nih cun Tatmdaw ralkap chungin le Tatmadaw ralkap pawl an chung le he dihlak fonh in minung 150 hrawng nih COVID-19 zawtnak an i chawnh tiah a chim.

A tulio Myanmar ramkomh chungah COVID-19 mizaw a dam mi nakin Mizaw a karh mi an tam cuahmah. Tatmadaw chung zong ah a dam mi nakin mizaw an karh deuh tiah Brigadier-General Zaw Min Tun nih a chim. Ralkap chung ah mizaw an um lawng sioin, ralkap siibawi te sin zong ah zawtrai an i chawnh cang tiah theih a si.

Cu ruangah Tatmadaw Siizung pawl cu Lockdown an chiah cuahmah cang hna. Yangon khualipi Shwedagon pura pawng ah a ummi ihkhun 500 siizung pi le Pyin-Oo-Lwin Ralkap siizung ihkhun 1000 zong Lockdown an chiah cang hna. A tulio Yangon khuachung ah COVID-19 mizaw dihlak 3900 leng an si cang-Chin Broadcasting Network|Source: BBC