Pi Sui Doi Bawmhnak Cu Mizapi Tanpinak Thawngin RM 23,020 Pek Asi Cang. Nan rak theih cia bangin Pi Sui Doi cu cancer in siizung ah caan sau nawn a um hnu ah, CYOM le CRO ibawm in bawmhnak hal piak a si. Sihmanh sehlaw Covid-19 he aa ton caah duh ningin kan cawlcang kho lo i, Atu ceo hi a sin ah dawtnak kut nan samhmi kan va phakter khawh hi a si.

Hi tluk Covid raichia lakah miharsa cungah zawnruahnak a ngei i a pe chantu miphun hawi nan dihlak cungah kan ilawmtuk hringhran. Ahlei in USA hrambunh Chin Releif Organization(CRO) cungah kan ilawmtuk.

Malaysia dirhmun cun Covid lakah mizapi sin bawmhnak kawl hi a fawi lomi a si. Zeitin dah kan tuah lai tiah kan van a san lio ah, CRO nih biatak tein an vun kan tanpi nak thawng le Bawipa thawngin hizat phaisa bawmhnak kan hmuh khawh hi a si . CRO thawngchin ko seh. CRO le pechantu dihlak nan tuan kawlnak kip ah Bawipa nih lam in hruai hna in thluachuah in pe chin ko hna seh.

Pi Sui Doi zong tlamtling tein operation aa tuah khawh cang. A rauh hlan ah damnak tling a hmuh khawh than i, Pi Sui Doi le chungkhar sin in Bawipa sunparnak kan hmuh than khawh nakhnga thlacamnak in bawmh cio hna dingin kan in sawm hna.

Lawmhnak he
CYOM

Lawmhnak le Theihternak: Miphun hawi hna Pi Sui Doi caah tiin bawmhnak a pe mi nan dihlak cungah lawmhnak chimcawk lo kan ngei. Thawng kan rak thanh cang bantuk in May 17,2020 in Online pek nak cu kan khar cang tiah thanh kan in duh hna.

Online bawmhnak nan pek mi a dihlak $ 5,204 a si. Cash le Check a dangdang in a pe mi zong nan um. A rauh hlan ah Pi Sui Doi sinah phakter khawh kan i zuam lai.Bawmhnak nan pek mi min list le a herh dangdang a um ahcun Chin Relief Organization Facebook page ah kan rak langhter than te lai. Petu nan dihlak cungah Pathian nih a let tampi thluachuahnak in pe chin ko hna seh.

Medical treatment for Pi Sui Doi. Malaysia um Chin miphun kan unau asi mi Pi Sui Doi cu January 2020 khan damlo in a um i a zatnak hi Cancer stage 3 tiang nihin ah cun a phan cang. Pi Sui Doi hi Malaysia ah ava he khuasa mi an si i Laitlang a chuahkehnak tak cu Thantlang peng, Vomkua mi asi, a chungchuak fanu pakhat hi Australia ah ava he khuasa in an um.

Malaysia dirhmun cu nan hngalh cio bang a cancer hi surgery tuah nak ding hi Malay phisa 70,000 RM dih ding in Zato (Hospital) lei nih an ti hna i kan mah Chin Relief Organization sin ah April thla thawk ah khan bawmhnak a kan hal. CRO cu mipi sin lila ah bawmhnak a halpiaktu ceu lawng kan si caah dawtnak le zawnruahnak he nan sinkhawh tak cio in rak bawmchan ve cio ding ah upatnak he kan in sawm hna. Lawmhnak tampi he, Chin Relief Organization (CRO Team)