Cozah Rian Tuan Mi Hna CDM A Tambik Cem An Si Cang Min Aung Hlaing Cu Akhuaruahhar Cang. February 1 in ralhrang phu hna nih hramhram nawlngeihnak an lak hnu ah ralhrang uk duhlo cawlcanghnak CDM ah a tel mi cozah riantuan hna cu federal journal nih cazin an lak ning ah Chin ramkulh cozah riantuan tu hna dihlak minung 14,591 an si, ramkulh cio in CDM cawlcanghnak ah tambik a tel mi cu Chin ramkulh chung in an si tiah an langhter.

Chin ramkulh ah cozah riantu tu dihlak 20000 leng chung ah 14000 leng nih CDM cawlcanghnak ah an i tel caah zatuak in 72% leng a si. Chin ramkulh ah CDM lutmi hna chung in ngandamnak lei cozah riantuan tu an tam. Mindat ah cun atu tiang ah sizung zong tha tein hon khawh a si rih lo. Thazaang a tling tuk, a ruang cu Chin chung ah hin sibawi tampi an i tel, cheukhat cu Director reng zong an i tel. Cun zaang lek nak lei zong ah rampi min thatter tu hna zong an i tel.

An umnak department cio in reng sang zong nih CDM cawlcanghnak ah an i tel hna.Cucu Chin ramkulh CDM cawlcangh nak ah teinak pakhat a si ” tiah CDM cawlcangh nak ah a tel mi cozah riantuan pakhat nih a chim. Ramkulh chungah Chin ramkulh in CDM cawlcanghnak tambik a tel kho mi a si, ralhrang phu hna nih rian sok ding in auhmi cozah cazin ning ah hmundang ramkulh le ramthen 14 chung ah riansok tu dihlak hi minung thong leng an si nain , Chin ramkulh chung ahcun riansok tu minung pakhat hmanh an um lo tiah theih a si.