Hakha khua thar saknak ding hmun ah phun ning loin inn a sakmi pawl cu cozah nih thaizing August 20 ah cozah nawl ngeitu hna nih an ṭheh/hrawk cang hna lai i, inn ngeitu pawl an lungtlin lo ruangah inn an ṭheh tikah kan inn chungah nunnak thap in kan inn kan kilven lai tiah Hakha Lothlo pawl nih U Zun Peng nih a chim.

U Zun Peng in “Hakha ah kutthiam ngei (let-ta-ma) kan hlan tikah  hna ah nikhat hlawh 20000 kan pek hna, Inn fate kan sak hmanh ah a tlawmbik ting 15, 20 hrawng a dih, Inn ngapi cu ting za reng loin sak mi asi, vawlei man a um lai, cu ruangah, inn an ṭheh/hrawh cu kan duh lo lawlaw, inn an rak ṭheh tikah inn chungah um in inn kanmah zong kan hrawk chih lawlaw hna seh! Khoika hmanh kan kal lai lo kan inn chung lawnglawng ah kan um lai. Thih le lohnak a um zong si le cozah nawl  asi ko, cozah cu kannih i va uk ding a ngah lo pi” tiah a chiim.

Chin ramkulh sipin tlangbawi U Soe Thet nih“atu tiang kan ton cuahmah. Cozah i tawlrelnak bantukin a lungtlingmi caah inn hrawhpiak an si bakin direct in hmundang ah thawn khawh dingin kan tawlrel lai. Angaingai ti ko ahcun inn hi kan hrawh duhmi a si lo, mah le mah lawngte kan si. Online lei zongah thawngpang phunphun in a um. Ccozah niha tawlrelmi cunah a lungtling lomi caah zeihman tawlrelpiak an si ti lai lo” tiah a chim ve.

Khua thar caah sipin nih an luttermi Ekah 600 reng lo cu hmun an ṭhen thluh  i cu hmun an ṭhenmi zong a dik lo taktak tiah U Zun Peng nih a chim. U Zun Peng nih “vawlei hmun an thennak hmun zong a phunphun a um, hmun thatha pawl cu bawi le upa caah an chiah, Mi harsa rethei caah pi 40 – 60 in an tah i tangka tlawmte dih dingin an tuah, hihi cu a dik lo taktak lomi asi” tiah a chim tthan rih.

Phung ning loin inn sakmi cozah nih a ruahmi inn hna cu thaizing suimilam 8:00 in an ṭheh/hrawh hram an thawk cang lai i, cozah, ram uktu lei, thingram lei, palik, meithat lei, sipin committee le cozah rian ṭuantu hna zong an tel lai.

U Soe Thet nih “sak dih cangmi inn hi 103 hrawng a um i, inn ah a ummi hna hi inn 30 an si, cu chungin mi 8 cun anmah tein an ṭheh dih cang. Theh dingmi chungin minung umnak inn cu 22 lawng asi, a dang inn 90 hrawng cu minung an um lo in sakmi inn fate an si” tiah a chim ve. Cozah nih phung ning loin inn sakmi pawl ṭheh ding in August 8 ah khan an timh cang nain an ani let tthan i, ni 19 ah ṭheh ding an ti hnu ah ni 20 an thawn ṭhan i, thaizing ah an ṭheh dih cang lai. Ref: CW