COVID-19 KONGAH A DIK LOMI RUAHNAK: 1. KANNIH CU PATHIAN NIH A KAN VEN LAI I KAN HIM KO LAI: Psalm 91 ah pei, “Na keh lei ah mi 1000 an thi ko lai, na orh lei ah mi 1000 an thi ko lai, nang cu na him lai a ti cu” timi ruahnak hi a dik lo ngaimi asi. USA i a thimi ahkhin Pathian ai bochanmi an tampi ve lai ti kha na theih a hau. Nangmah nakin thla a cam deuhmi minung tampi an thi cang ti zong na theih fian ahcun a ttha. Zumtu zong zumlotu tluk in i ralrin kan herh ve.

2. SI AN SER KHAWH CANG: Si an ser khawh cang ti le vaccine( ikhamnak si) an ser khawh cang timi hi tam ngai te nan ttial cang. Asiah aho tal cu si cun a dam cang maw? Si an sermi nih minung tam nawn a damh cang hna hnu lawngah hi bia hi zumh ding le post ngam ding asi.

3. PROPHET BIAPHUAN: Tuchan cu prophet chan asi ti lo. Pastor chan a si cang. Pathian nih prophet hmang in bia a chim ti lo. Bible hmang in bia a chim cang. Cucaah a caan lo i bia a phuangmi prophet cu prophet deu an si dih caah an bia zumh bak lo ding asi. Pathian nih prophet hna hmang in bia a phuan lo lio i an rak ttialmi Bible cu Appocrypha Bible ti asi i pom lomi Bible ah ai can bantuk kha asi.

4. INTERNET, FACEBOOK IN ZAWTNAK AN DAMHNAK KONG KA REL: Online i cattialmi pohpoh hi bia dik an si dih lo. Bochan awk a tlakmi (source) chimmi lawnglawng hi zumh ding asi. Bianabia ah CNN news, BBC News, RFA news, VOA news, Khawlram cozah news, WHO news. Mizeipoh i an ttialmi kha nai zumh sual ahcun lam tlau a fawi te.

5. PUMHNAK ZONG TUAH DING ASI KO, PATHIAN NIH A KAN ZOH SAWH LAI LO: Zawtnak a ngeimi sinah vai pum hmanh, an zawtnak an in chawnh bak ko lai. Pathian nih zaapi hmun khat pumhnak caan a kan pe rih lo, pumpaak in Pathian biak caan asi titu kha thei law a ttha deuh.

6. KEICU MAHHI ZAWTNAK HI KA TTIH LEM LO: Hi zawtnak hi na ttih lo men ko lai. Thih zonghi na ttih lo men ko lai. Vawlei ah ruahchannak ngei ti lomi zong na si kho ko. Asinain nai ralrin lo ahcun zawtnak nai laak lai i na chungle na thah dih khawh hna. Mi tampi nunnak na sungh ter khawh.