Atu lio vawleipi thinphang taktak in a chiatu Covid-19 zawtnak aa thok ning le sining cu vawleicung mifim, mithiam tampi nih an kharhlai len ko nain atu tiangah a dikmi an hmu kho rih lo i, a damhnak sii zong atu tiangah hmuh khawh si rih lo. Cu tikah hi zawtnak kongah thawngpang deu tampi chim cio le theih cio asi. Atu zongah Covid-19 zawtnak cu Internet 5G chungah a kal/um tiin atu lio ah a lar ngaimi pakhat asi cang.

Hi kong a chimtu cu sii-ai lei ah minthang, 1984 kum ah Michigan State University College of Human Medicine degree tiang a hmutu asi mi Dr Thomas Cowan asi. Milar minthang asi pinah cauk zong tampi a chuah cang mi asi i, “Ask the Doctor” timi cauk zong asi. Cu pinah ‘Weston A. Price Foundation,’ dirhtu zong si i, atu a chimmi bia nih mipi cu khuaruahhar taktak in a chiah hna.

Mar 12, 2020 ah Parents for Healthcare Rights hna nih Youtube ah an post piak i, a zohtu minung 617,414 le comment-tu 2,484 an phan manh. Cu ti cun Social Media ah an share piak chin i, mi tthenkhat nih an zumh i, tthenkhat nih an zum ve lo. Hi kongah Dr Thomas Cowan nih a chim mi cu, “Phone le seh thilri nih minung ngan damnak a hrawh dih, 1918 kum ah radio thazaang an hmuh i, vawleicung ah Spanish flu zawtnak a rak chuak i, minung 500 million hrawng nunnak a liam.

“1968 kum ah vawleipi lengah ah satellites an rak kah chuah i, Hong Kong flu zawtnak hrik a tlung, hi zawtnak hrik hi cu thisen lakah a um mi a sinan internet cet thilri ah a kai kho mi asi. Cu caah tutan zawtnak Covid-19 cu 5G “radiation” ruangah a si, 5G um lo nak Africa ramchung ah zawtnak ngeimi an um rih lo.

Cu ti a chim mi ruangah 5G “radiation” cu mipi nih an soisel cio i 5G tung an phunmi pawl cu mei in an khangh dih. 5G “radiation” ah rianttuantu hna zong harnak tongmi an um tikah WHO nih mipi ruahnak cu thlen dingin thanhnak an tuah pinah Africa ramchung ah Covid-19 zawtnak a ngeimi minung 600 hrawng an um cang. Covid-19 le 5G internet thilri hi pehtlaihnak a um lo tiah an chim.

1 November 2019 ah China ram in 5G national network hi hman thok asi i, an ramchung ah 100,000 5G tung (towers) a um cang. Jonno Reilly nih “2003 kum ah 3G an hman thok i, SARS zawtnak a chuak, 2009 kum ah 4G an hman thok tthan i, Swine flu zawtnak a chuak. 2019/2020 ah 5G an hman i, Coronavirus a chuak tiin Twitter ah a tar.