Atu lio cu upa ngakchia kan zapi in COVID-19 raal kan doh cuahmah lio a si. Hi lio caan ah kan Chin Ramkulh Cozah nih zapi zulh ding le ralrin ding nawl a chuah mi kha zapi sin ah rianrang tein thawng thanh a herh tuk lio caan a si. Cu bantuk in cozah nih nawl a chuah mi kha rammi zapi zong nih atu bak ah zulhcolh a herh lio caan a si ve. Cu tik ah a biapi tuk ve cang mi cu cozah nih cu bantuk nawl a chuah mi kha media hmang in zapi sin ah a thanh ding mi kha a biapi tuk ve. Nihin kan Cozah le Runvennak rian a tuantu hna nih ralrinnak rian biatak tein an tuan i an i zuam ngai hna nain zapi sin phanhter ning kong ah media hman thiam le pehtlaih thiam a herh ngaingai.

Hi lio ah a cheu cu, anmah le an rian cio an cawlcanghnak zapi theihter ning kong ah a chambau ngai mi upate kan tam ngai rih. Phun dang in kan chim ahcun “media friendly” a si lo mi riantuantu kan tam ngai rih. An rian zapi sin thanhnak ah social media sawhsawh lawng aa rinh mi le a hmang mi riantuantu upa an tam ngai rih. Hihi tutan OVID-19 raldohnak lawng ah si lo in cu hlan an riantuannak cio zoh tik ah a lang mi a si. Cozah- zaatlaang phu le ramkheel lawng si lo in biaknak lei riantuannak tiang zong a huap mi a si. Media riantuantu zong nih kha hna an riantuannak kha nifatin in kan pehtlaih hna i an riantuannak kha zapi sin ah langhter ve ding kan rian a si ve. Asinain nihin tiang Chin media cu ramdang media bantuk in thlahlawh le tangka tam hmuhnak ngei lo mi kan si pin ah riantuantu minung zong kan i nguhdaih hna lo ca ah hi kong ah kan chambau ngai ve.

A zei si hmanh ah nihin bantuk thih le nun ri dirhmun in miphun ca i rian kan tuan lio ah hin riantuantu upate nih media pehtlaih le hman thiam kan herh ngaingai. A ruang cu rammi zawnruah a hau. Tutan ah Chinram COVID-19 runvennak cawlcanghnak zong ah cheukhat riantuantu nih media hman an thiam ngai lio ah cheukhat tuanvo ngeitu upa hna cu, an riantuan mi kha anmah pumpak facebook hna lawng in zapi sin ah a thanh mi an um. Hihi cu upa riantuan ning a si lo.

Atu chan cu pumpak facebook chan a si ko nain zapi theih le hngalh a herh mi cu media tling hrimhrim in a thanh awk a si. Cucaah kha bantuk ah khan cun media kha a sawm i a theihter ding hrimhrim a si. A bik in cozah tuanvo ngeitu nih kha ruahnak kha fian kan herh ngaingai. Cucaah nihin Chinram ah ramchung raalpi bantuk in kan doh cuahmah mi COVID-19 ralrinnak le i zohkhenhnak rian ah hin tuanvo ngeitu hna le media i pehtlaihnak hi thuk deuh in ngeih khawh i zuam hna usih. Credit: The Hakha Post Editor Hmurka. Fianternak: Hmanthlak hi google ta ai tlakning in laak chommi a si