COVID-19 Negative A Si Cangmi Positive An Si Ṭhan Tawnnak A Ruang Fianternak An Tuah Theih Abiapi Taktak
A tu tiang ah pulrai novel coronavirus ruang ah vawleicung i a thimi hi minung 243,000 renglo an tling cang. Hi zawtnak a ngei tiah fehtermi hna hi minung 3.4 million renglo an si cang. Vawleicung ram ah zawtnak a tam biknak United States ah zawtnak a ngei tiah theih cangmi 1,263,092 million renglo an tling cang. Cu chung ah US ramchung in hi zawtnak a thihpi cangmi hna hi minung 74,799 an si cang ti a si.
Johns Hopkins University Center for Systems Science and Engineering hna nih data an khawmhning in a cunglei bantuk hin an langhter. An chim chih rihmi cu hi kan langhtermi nak hin vawleicung ah hi zawtnak a ngeimi hi an tamdeuh ngaingai lai. Zawtnak an ngeih le ngeihlo hneksak khawh cawk rih lomi hna le ram cheukhat nih a sining taktak in an chim duh lomi zong um khawh a si tiah an chim chih.
Zeiruang ah dah COVID-19 negative a si cang timi cheukhat hna kha caan tlawmpal hnu ah hneksaknak tuah ṭhan tik ah positive an si ṭhan tawn? Hi biahalnak he pehtlai in WHO technical Maria Van Kerkhove nih a tanglei bantuk in lehnak a tuah. Pathianni ah BBC in The Andrew Marr Show nih a halmi cu April thla ah an thanhning in South Korea ah COVID-19 in a dam cang timi cheukhat hna cu hneksaknak tuah ṭhan tik ah positive an si ṭhan ti a si. Hi bantuk hi zei ruang ah dah a si tiah an hal.
Hneksaknak tuah hnu ah negative a si cang tiah timi mi cheukhat hna cu zarhkhat maw zarhhnih a silo ah cu nak tlai deuh hnu zong ah positive an si tiah hmuhchuah ṭhan a si. Hihi cuap ah thil a cangmi kong a si. Kan cuap hmun cheukhat chung ah a ummi zawtnak hrik a thimi pawl kha hneksaknak tuah tik ah an hung lang. Kan cuap hi ṭhen tampi ah ṭhen an si i cucu hneksaknak an tuah ṭhan tik ah PCR positive an si ṭhan tawn.
Cucu hawi chawnh khawhmi zawtnak rungrul a si lo, thazaangthar in ṭhawnnak pek, caan zeimaw can hnu ah a thar in van i hrimh ṭhan le cawlcangh ṭhan zong a si lo. A ngaingai tiah cun positive an si ko nain damh cuahmah liomi an si tinak a si. Cu caah hi kong hi theih a ṭha ngaingaimi pakhat a si tiah Kerkhove nih a chim. Chirhchan: ABC News