Admin||05|Biangreithlep 10|2020|| Kan vuleipi hi zoh tikah ṭhat lei panh loin chiat lei a panh chin thluahmah ti hmuh khawh a si. Kumkhat hnu kumkhat thil ṭhalo a hung chuak lengmang. Zawtnak chiahru ṭihnung phunphun a chuak i mi tampi nunnak tiang a laak phah. Tukum zongah Chin ram a chuakmi tiah rauh bikmi Covid-19 timi nih vulei cung ramkip a cul dih i rel cawk loin mi tampi nunnak a liam.

 

Kum 2019 Dipa in aithawkmi a si i a tu hi Biangreithlep kan phan cang. Asinain a tu tiang khoika hmun set dah aithawk i zeitindah aithawkning a si timi hmanh fiangfai in theih khawh a si lo. Mi tampi zumhnak ah China, Wuhan Market in aithawkmi a si ko ti hi zumh bikmi cu a si. Asinain cu zong cu a fiang hlei loh. Covid-19 zawtnak cu a phunphun a ichawnh a si timi thiamsang hna nih a hmuh khawh.

Tutan ah kan rak ṭialmi zong nih minung sinah hlathlainak an tuah hnuah an hmuhmi a si. Cucu zeidah a ti ahcun nuva ihṭinak le pa baw in hi zawtnak ichawnh khawh a si tiah an hmuh ṭhan. Scientists pawl nih pulrai zawtnak novel coronavirus hi pa cheukhat hna baw chung ah an hmuh. Hi kong he pehtlai in cacawn nilini ah hi zawtnak hi nu le pa hmunkhat ihṭinak in i chawnh khawh a si maw timi biahalnak a hung chuak.

China’s Shangqiy Municipal Hospital ah a ṭuanmi doctor pawl nih pa minung 38 hna cu an cii an laak hna. Cu an baw an laakmi cu hnaksaknak an tuah tik ah minung 6 cii chung ah zawtnak hmuhchuah a si. Cucu zatuak minung 16 chung ah zawtnak a um tinak a si tiin Reuters thawngzamh nih an thanh. Nu le pa ihṭinak in hi zawtnak hi i chawnh khawh a si maw timi kong ah biafiang a um kho rih lo. An chimmi cu hi novel coronavirus hi nupa ihṭinak in i chawnh khawh a si ah cun i runven le kham a har ngaingai lai tiah hlathlaitu phu hna nih American Medical Association Journal ah an ṭial.

A bik in an buainak a ruang pakhat cu hi bantuk in zawtnak an hmuhchuahnak baw a ngeitu hi coronavirus in a zaw i a dam cang tiah an timi chung in a si caah a si. Hlathlaitu hna nih an chimmi cu zei a si hmanh ah kan hlathlai ning hi kaupi in a si rihlo caah tam deuh le kau deuh in hlathlai ṭhan a herh ko tiah an chim.

Hi kong he pehtlai in zeitin dah zawtnak rungrul hi baw chung ah a um ning a si le zei can tiang dah a um khawh i zei tin dah cii in i chawnh khawhning le i chawnh khawhlo ning tibantuk hna felfaite in dothlat cu a herhmi rian a si tiah hlathlaitu phu hna nih an ṭial. Hi bantuk in pa cii chung ah COVID-19 zawtnak kan hmuh kan ti tik ah hin lau ding a si lem lo.

Zawtnak rungrul dangdang Ebola le Zika tibantuk hna zong pa cheukhat cii chung ah hmuh an si ko tiah Britain’s Sheffield University i andrology professor pakhat a simi Allan Pacey nih Reuters thawngzamhtu sin ah a chim. Tuan deuh hlathlainak rak tuahmi ah cun China ah zawtnak a ngeimi minung 12 hna i an cii ah cun zawtnak hmuhchuah a rak si lem lo tiah New York Post nih an langhter chih. Ref: NYPost