Dr. fauci nih tunai ah a thanhning in vawleipi thlakawkbar in a kan chiantu coronavirus nih nunnak a laak cuahmah peng ko rih. United States chung ah minung 15,774 nunnak a laak cang i vawleipi huap in cun minung 90,057 an phan cang tiah a chim. Johns Hopkins University, Center for Systems Science and Engineering hna nih an thanhning in United States hi vawleicung ah a zualhmat biknak ram a si peng ko rih. US ramchung dihlak ah hi coronavirus zawtnak a ngeimi hi minung 432,000 renglo an tling cang. Cu hmanh ah cun New York State hi a zual biknak hmun a si tiah an chim.

Vawleipumpi huap in hi coronavirus a ngeimi dihlak theihkhawhtawk hi minung 1.5 million renglo an si cang. Cu hmanh ah cun hi nak in zawtnak a ngeimi hi an tam deuh hrimhrim lai tiah zumh a si. Zawtnak an ngeih le ngeihlo check khawh lomi tampi an um rih pin ah ram cheukhat nih a sining taktak in a chim duh lomi an um lai tiah zumh a si rih. Ref: ABC News

Chap: Maw minung kan nunnak a hei tawi ve ning le kanmah te in ai khamh kho lomi kan hei si zia hi. Nikum kumdongh December 2019 ah China in ai thok tiah ruahmi zawtnak rungrul phunkhat ruang ah hi zat lengluang nunnak a hei liam ko ngai hi. Maw Khuazing Pathian na sermi minung hi zei ko hme kan si i a zawn na ruah. Fapa ngeihchun hmanh zuah hnginlo in a caah na pek ti hi ka ruah ah ka lung nih a phan lo.