Coronavirus kong ah a ho hmanh raltthat awk a ttha hrimhrim loh. US President Trump zong a rak i ruahning leng in a ram mipi an thi thluahmah cang. A lungre lawng a thei chin lengmang ko cang. A tu tiang ah hi zawtnak ruang ah vawleicung dihlak ah a thimi hi minung 225,000 renglo an si cang. United States chung lawng bak ah hin minung 60,207 paoh cu a thimi an si cang tiah thanh a si.

Vawleicung dihlak theih khawhtawk ah hi zawtnak a ngeimi hi minung 3.1 million renglo bak an si cang tiah Johns Hopkins University Center for Systems Science and Engineering hna nih data an khawmhning in an langhter. An chim chihmi cu a ngaingai ti ah cun hi nak hi vawleicung ah coronavirus zawtnak a ngeimi hi an tam deuh lai. Hneksaknak tuah khawh cawk lomi hna le ram cheukhat nih a sining taktak in a chim duh lomi zong um khawh an si tiah an chim chih.

Nihin tiang in United States cu hi zawtnak nih faakbik in a tonghmi ram an si peng ko rih. US ramchung lawng bak ah hi zawtnak a ngeimi hi minung 1 million renglo an si cang. Minung 60,207 nih an thihpi cang ti a si. Kan theihchih ding pakhat cu US ram zong ah hin a zawmi paoh hneksaknak hi cuhlan ah cun tuah khawh an si ve hlei lem loh. Kan hnu te ceo ah President Trump nih mi zei paoh hneksak a herhmi cu kan hneksak cang hna lai tiah a chim.

Kan hnu zarh ah khan President Trump nih hi coronavirus hin minung 60,000 cung cu ka kan thi lem lai loh tiah a rak chim. Cun cacawn nikhatni ah khan a thimi minung 55,000 an hong phak tik ah minung 60,000 in 70,000 hrawng cu kan thi te men ko la tiah a chim tthan. A tu tiang hmanh ah a thi cangmi hi minung 60,207 an tling cang ti a si. Ref: ABC News