Kan langhter hmasa cang bantuk in tutan ah Covid-19 damhnak caah a ttha lai timi sii nih hin coronavirus hi cawlcang kholo in a tuah ti a si. Nathional Health Service (HNS) le US mithiam pawl hna nih cun hi Ivermectin hi thil dang pakhat khat he fawnh in an hman tawnmi a si. A sinain Australia scientist pawl nih cun hihi COVID-19 dohnak ah kan hman khawh hrimhrim ko lai tiah an zumh.

Ivermectin nih hin suimilam 48 chung ah hi coronavirus hi minung kan taksa chung ah zei hmanh tuah kholo le cawlcang kholo in a tuah khawh ti a si. Hneksaknak an tuahmi ah an hmuhchuahmi cu hi sii nih hin coronavirus hi suimilam 48 chung ah zatuak 99.8 cu zeihmanh cawlcang kholo bak in a tuah ko ti a si. Nithum hnu ah cun a dihlak bak in a chuah khawh dih ko tiah an chim chih.

Royal Melbourne Hospital Scientist pawl nih cun hi sii ivermectin nih hin virus nih minung kan pumsa fahnak a peekmi kha a zorter ko lai tiah an zumh. A tu hi coronavirus in a zawmi ah hi sii hi kan hneksak phot hnga maw ti an i ruah le al cuahmah lio a si.

Ivermectin hi kum 1970s lio ah khan rak hmuhchuahmi a si i zawtnak phun tampi thlopnak ah a biapi taktakmi sii phunkhat a hung si. Tahchunhnak ah thakpherh hrik thahnak tibantuk zong ah a ttha ngaingaimi a si. Worlh Health Organization zong nih Essential Medicines list ah an chiahmi pakhat a si. An chimmi cu hihi ngandamnak caah a himmi le fahnak zeihmanh a pe lomi sii ttha ngaingai a si tiah an chim chih. Ref: Dailymail