US thlichia update: Ngaihchia ngaingai a si ko. Kan vawlei hi thawngpangttha theihawk a tlawm chin lengmang ko. A umlo tluk a si. Cacawn nithumni zaan ah khan Oklahoma le Texas ah thlichia nih minung pathum a thah hna ti a si. Marshall County Emergency Management hna nih fehternak an tuah tthanmi ning in Madill, OK ah minung pahnih paoh cu an thi ti ah an chim. Cu lawng silo in hliam a tuarmi zong tampi an um rih tiah an chim chih.

Polk County, Texas ah hin a tlawmbik minung pathum paoh cu an thi lai tiah ruah a si. Onalaska, Texas hi thlichia a fahbiknak hmun a si rih. Hliam tuarmi hna le harnak a tongmi hna an kawlhawl cuahmah hna lio a si. Polk County Emergency Management official hna nih a tlawmbik minung 20-30 hrawng paoh nih cun hliam an tuar lai tiah an chim. Madill ah hin thlichia nih thir le thing pelpawi hna cu cacawn nithumni zanlei ah khan a ziit len lio hna cu video zong ah fiangte in an lang tiah an chim chih. Madill hi Oklahoma thlangleikam ah a ummi a si i Texas ramri in meng 10 hrawng a hlatnak ah a ummi a si.

Gov. Abbott nih ka office ah rian ttuantu pawl, Texas Division of Emergency Management hna le a dangdang state agencies pawl hna cu local officials pawl hi thlichia nih harnak a peekmi hna bawmhding in an chuak colh tiah cathanh in a chim. State nih bawmchantu phu le ngandamnak lei rianttuantu phu hna he Texas mipi hna cu an zuanhnawh colh hna. Tuzan ah ttih a nungmi nikhua nih a chuah pimi ruang ah harnak a tongmi Texas mipi hna kan thinlung in kan in tuarpi hna. State nih nanmah bawmhnak ding caah a tuah khawhmi paoh cu kan tuah lei i kan in bawmh peng ko hna lai tiah a chim. Ref: ABC News