Nihin kan chan hi zei ton ko hme kan ton! thawngpangchia le mitthli tlaknak lawng te nih a kankeip in a kan tlunhnawh ko hi. Maw kan cung Khuazing na lairel ngai hi vawleimi caah theihthiam a har ko tiah hrum ruangmang lo awk a ttha hrimhrim loh. Nizan zanlei deuh ah khan thli a hraang, ruah a sur i rial an tlaak caah inn 24 hrawng cu minung umnak tthalo tiang in an rawk dih tiah theih a si.

Vanglaini nih an thanhning in nizan zanleisang ah khan Mizoram hmun cheukhat ah thli faakpi in a hraang. Ruah buanbok ngaw in an sur i rial zong an tlak chih caah in tampi an rawk. A bik in Sesawng, Muthi le Dampui khua hi an zualhma. Hi khua pathum chung ah hin inn 24 hrawng cu minung umnak tlaklo tiang in a rawk hna. Muthi Branch YMA hna nih kan khuachung ah hin pumpaak in paruk, YMA hall le library, sianginn le Salvation Army biakinn hna cu umnak tlaklo tiang in an rawk. Inn dang zeimawzat zong rial nih faaktuk in a tlak hna caah remh haumi tampi an. Inn umnak a ttha ti lomi pawl hna cu kan ttheh hna hi YMA Committee Room ah kan fimtawl hna. Hi inn ai rawkmi ah khua a sami hna cu an chungkhat neihniam sin ah an i fonh chung hna. Ai rawkmi inn pawl cu nihin ah khuapite in remh an si lai tiah an chim.

Dampui Branch YMA hruaitu sin in thawng theihning ah cun an khua ah minung umnak tlak tilo tiang in inn nga hrawng an rawk. A cheubang ai rawk i van remh ah cun um khawh a simi hi inn 10 hrawng an si. Umnak tlaklo tiang in ai rawkmi pawl hna cu ttheh lawlaw an si i a remnak hmun paoh ah chiah chung an si. Hi inn ai rawkmi remh rian cu nihin ah khuapite in ttuan a si lai tiah thawnglatu sin ah an chim.

Sesawng Branch YMA hruaitu sin in theihning ah cun an khua ah inn minung umnak tlaklo tiang in ai rawkmi inn 9 an um. Rawk nelnual in a ummi hi inn 7 hrawng an si. Umnak tlaklo tiang in ai rawkmi inn ah a rak ummi hna cu an chungkhat inn ah umter chung an si. Hi bantuk in vanchiatnak a tongmi chungkhar hna cu YMA nih an eiding rawl a tuaktaan piak hna lai. Cun hi bantuk in inn rawk ruang ah hin hliam a tuarmi minung pakhat a um fawn. Nihin ah inn ai rawkmi pawl hi khuapite in remh rian kan ttuan tiah an chim. Ref: Vanglaini