Coronavirus ruang ah Madrid Open cu i celh khawh a si lo. Hi lentecelhnak a tuahtu hna nih cun tu thla dongh ah hin Tennis World Tour Videogame in i celh ding in an timhtuah lai. World number 1 Novak Djokovic le Rafael Nadal hna cu ai celhding an si.

Tennis World Tour Videogame in an hmuhmi phaisa hna cu coronavirus a ngeimi hna bawmhnak ah hman a si lai. Hi lentecelhnak hi a ra laimi April 27-30 tiang a si lai i tennis celhthiam pawl cu videogames hmang in an i celh ve cang lai tinak a si. La Liga nih cun March thla ah khan online hmang in FIFA football tournament cu an rak tuah cang. Real Madrid aiawh in Marco Asensio nih champion a laak. Hi games hmang hin midang bawmhnak caah phaisa Euro million khat renglo an rak hmuh.

Tennis online games ah hin single in ai celhding nu le pa 16 veve an si lai i phuli ah tthen an si lai. Hi lentecelhnak a tuahtu hna nih an chimmi cu hi celhnak in kan hmuhmi cu midang bawmhnak caah a si lai tiah an chim. Cu bantuk in hi bantuk lentecelhnak ah mi nih uar khunmi pawl celhter an timh hna.

Tournament director Feliciano Lopez nih Professional player pawl cu an umnak inn chuahtak haulo in an i celh lai. Tukum Madrid Open kan i celhding ning cu phundang bak te a si lai. Lentecelh nuamhnak sawsawh silo in lente ai celhmi hna hi phaisa an i cawi/thap lai. Cu phaisa an i cawi/thapmi cu midang bawmhnak caah a kal ve tthan lai tiin an phaisa hmuhnak ding le hmannak ding kong zong a chim chih. Ref: Sportstar