Coronavirus Nih Hin Zawtnak Le Thihnak Lawng Silo In Nungna In A Kan Thah Cuahmah Ko

Thawngpang

Coronavirus nih hin zawtnak le thihnak lawng silo in nungna in a kan thah cuahmah ko. Coronavirus ttih ruang ah minung 4.4 million renglo bak rian ngeilo in an um tthan cang. A tu tiang theihkhawhtawk ah hi zawtnak ruang i rian a ngeihlo ruang ah harnak a tong i unemployment benefits a halmi hi minung 26.4 million bak an tling cang tiah US Federal data nih a langhter. Hihi US ramchung thilcang lawng a si rih.

Kan hnulei zarhnga chung ah khan American ramchung rianttuantu zatuak hleiruk (16%) nih an rian an chuahtaak cang. Hi bantuk in a kal chin lengmang ah cun Amecian economic a tum thluahmah khomi a si. Ram tampi ah cun coronavirus ttih ruang ah rianttuannak company vialte an khaar thluahmah cang hna. Coronavirus nih hin zawtnak le thihnak lawng silo in kan nungna in a kan dolh cuahmah ko.

A tu tiang theih khawhtawk ah hi novel coronavirua zawtnak a ngeimi hi vawleicung ah minung 2,661,518 renglo an si cang. Cu chung ah hi zawtnak a thihpi cangmi hna hi minung 185,504 renglo an phan cang. Hi zawtnak a ngeiko nain a dam tthancang an timi hna hi minung 730,843 an si ti a si. A tu tiang rih ah cun US hi zawtnak a tam biknak ram an si. US ramchung ah hi zawtnak a ngeimi hi 849,094 an tling cang. Cu chung ah damh tthan khawhmi hi minung 84,050 lawng an si rih i hi zawtnak a thihpi cangmi hi minung 47,684 bak an tling cang tiah Worldometers nih an thanh. Ref: New York Post + Worldometers.info

Leave a Reply