Kan theih cio bantuk in coronavirus ruang ah vawleipi cu lungmit in a tuah. Kan nunphung le kan khuasakning zong tampi a thlen. Vawlei ah minung tampi nih sii inn ah phanhpi i nunnak zong tampi a liam. Harnak a phunphun in ton a si ti cu mi vialte nih kan ton cuahmah ciomi a si. Cu lak ah ngaihchiat awk ngaingai a simi cu hi zawtnak hi caan ttha ah i laak riangmang in mah pumpaak hlawknak le pawkhimnak ah a hmangmi an um hi a si. Cu bantuk in mah pumpaak hawknak ah a hmangmi cheukhat hna nih an tuahmi kan van langhter lai.

Pakhatnak: Myanmar ramchung ah nawlngeitu hna nih hi zawtnak ruang ah hin thilman nan kaiter hrimhrim lai lo tiah thanh a si. Cu bantuk in thanh a si ko nain mi cheukhat hna nih an facang tun man cu an kaiter lemlo nain an facang tun a zor.

Rawlman kai lo nain tunkhat chung rawl um zat a zor siloah a tun an hmet (fit). Tulio Thantlang lei rawlman a kai loh timi hi phundang te si. Rawl tunkhat ah pi 24 aum. Pikhat ah pawng 8 a um. Pi 24 ahcun pawng 192 a um ding a si. Nain Cuhlan ah cun rawl tunkhat ah hin pawng 150 hi a tlawm lei si tawn. Tuni (2.4.2020) ah Thantlang rawl ka cawk mi a rak tlung i tunkhat ah pawng 120( tin hnih) lawng a si. Khuate lei ah kawl pawl nih an zuar mi rawl hi a khat ngai mi lo nain a tun (sa-la-aih) an hmet (fit) ve hoi. Ref: Vantha Biklian

Pahnihnak: Kut ttawlnak (hand sanitizer) a dik lomi an zuar. Health Services joint director (Food & Drugs) Lalsawma nih hand sanitizer cawk tik ah i ralrin a hau. Hmun khat ah kan zoh cang i a dik lomi a si. Mi nih an mah duhpaoh in an rak siam ve sawsawhmi a si tiah a chim. Hi hi Mizoram lawng silo in All India Drugs Controller group zong ah member pawl an buai biknak a si. World Health Organisation pawl chimh cawnpiak ning in sermi hi rinh a tlak bik tiah a chim chih. Ref: Vanglaini