CoronaVirus kongah ka ruahning tlawmpal. CoronaVirus kong ahcun President Trump dirhmun hi ka cohlan khawh ngaingai. Zawtnak hrik nih a tonghmi minung dihlak ah 80% hrawng hi siizung phanh hau loin cumpit tlangrai thlawp sawhsawh in sii pumkhat-hnih din in an dam ko ti a si. Siizung phan tiangin a zawmi lak zong ahhin mino zaangthawng deuh pawl cu an dam than dih pah ngawt nain kumkhua upa le damlonak dangdang a ngei ciami deuh lawng hi a thimi an si. Atulio ah Convid-19 ruangah an buai biknak ram pakhat a simi, Italy, zong khi a thimi an tampi cang nain a thimi hi a buaktlak in kum 81 hrawng an si ti a si (Laimi zaran lebang cu tartlung in kan thih hmanh ah cu tiangtiang kan chan a sau lo).

A rengreng ah vawlei pumpi nih hmunkhat ah an buaipi cangmi zawtnak cu t’ih tuk ding a si tilo tiin ka ruah. An hloh khawh lo zongah an tlaihrengh khawh chom hrimhrim ko lai. Thil poi ngai pakhat bantuk ah ka ruahmi cu kan President nih hi Virus kongah amah rumro a holh tuk i hmual a ngei rua lo dah ka ti. Acozah aiawh in ngandamnak kong mithiam sang pawl tu hi zalawng deuhin biachimnak le fianternak tuahter lengmang hna sehlaw mizapi caah lung a nuam deuh ngai men lai.

A poi chinchin mi cu hi Virus nih a chuahpimi thinphan thlalaunak ruangah vawleicung economy aa sukkhak tukmi hi a si. Stock market ah phaisa a phummi caah fahnak tampi a chuahter hlei ah Meiti he ai pehtlaimi ah rian a tuanmi ca lebang ahcun mineng a tla tuk hringhran lai. Sushi tiangin aman lo dih cang. Meiti hi t’engki pakhat ah $20 hrawng lawng a si chom lai tiah thiamsang hna nih an tuakdonh. Meiti man t’um tuk cu mizapi caah a t’ha tuk ding a lo nain chaw lehthal tluanlo ruang (economic inactivity) le meiti tamtuk (oversupply) ruangah a cangmi a si lai caah thilt’ha a si hrimhrim lo.

Facang le tissue tampi i cawkcia luklak nih zeipi an kan t’hathnem men lai lo. Aa sukhak mi chawlehnak dirhmun lio ah zeitindah kan ngeihmi chawva kan tuaktan i kan tawlrel timi tu hi kanmah pumpak ca le kan chungkhar caah a biapi ding a si. Tax return in hmuhmi phaisa ngeihchun in mah duhmi thil man fakfak cawk caan a si lo. A tluang lomi chawlehnak ruangah rian loin um sual zongah caantawi pawcawmnak kongah lungrethei tukin khua tuaktan hau lo dingin zokzok in itimhtuah caan a si tiah ka ruah. Credit: Biak Hnin Sang