2020|Vaupi-24|| Salai Van||Coronavirus kong ah US President Trump cu World Health Organization (WHO) cung ah a lung a tling kho loh. Cu caah US nih WHO rian ttuannak caah a peek tawnmi phaisa cu peek tilo ding in biakhiahnak a tuah. Mi tampi hna nih hi bantuk in US nih WHO ah a peek tawnmi phaisa peek a phih ruang ah harnak tampi a chuak kho tiah an mawhchiat. Hi kong he pehtlai in China nih cacawn nilini ah World Health Organization cu coronavirus dohnak caah World Health Organization cu $ 30 million bak bawmhtthan ding in an thanh.

US hi cu hlan ah cun vawleicung ah World Health Organization (WHO) ah hin phaisa a thawh tam biktu ram an si. A sinain coronavirus kong he pehtlai in WHO cung ah an lung a awi tilo (mismanaging) an ti i fund an peek tawnmi an phihnak hi a si.

China Foreign Ministry aiawh biachimtu Geng Shuang nih tutan ah WHO rianttuannak caah chap tthanmi hi cu rak peek tawnmi $ 20 million chung ah ai tel lai lo. A dangte in chapmi a si. Vawleicung ram dihlak ngamdamnak i zoahkhenhnak a tthancho khawhnak hnga caah ti in chapmi a si tiah a chim. Tutan ah an chap tthanmi he cun China nih hin WHO ah $ 50 million bak an thawh cang lai tinak a si.

Geng Shuang nih a chimchih rihmi cu hi bantuk in China nih UN agency ah a thawhtthannak nih hin mipi nih China cozah le WHO cung ah zumhnak le bawmhnak a um khawh tthannak ding zong a langhter chih tiah a peh. Kan hnu lei zarh ah US President Donald Trump nih WHO pawl cu China in a chuakmi zawtnak ttihnung coronavirus a karh hlan ah an chimphung duh loh tiin WHO ah US nih phaisa an thawh tawnmi zong a rak phih phahnak kha a si.

President Trump nih a chimning in US mipi tax petu hna nih hin kumchiar in WHO rianttuannak ding caah hin $ 400 million in $ 500 million peng an peek. China he kan chimkem a si ah cun China nih hin WHO ah kumkhat chung i an thawhmi hi $ 40 million hrawng lawng a si. Cu nak in a tlawm deuh zong a si kho rih tiah a chim. Ref: Mizzima

Note: Chinworldnewsvening nih thawngpang kan ṭialmi hi mah nih phuahcawpmi kan ṭialmi a si lo. Reference/Credit/Source ṭha tein kan pek peng lai. Cucaah thawngpang kan ṭialmi kan palhnak a um cun theihter khawh peng kan si. Chinworldnewsevaning page ah pehtlaih khawh peng kan si. Mipi sinah thawngpang thlazamh na duhmi um cun kan i thlahzamh khawh piak ko. Laica kan ṭialning kong zongah ahmaan lomi le a dik lomi a um cun chimh cawnpiak khawh zungzal kan si.