Admin||01 Biangreithlep 5-2020||Coronavirus ruang ah US chawlehthalnak tampi a hnursuan cang. Hi kong ah President Trump zong a kenkip in turhkhawnh a tong lengmang cang. Cu kong he pehtlai in President Trump nih ramchung ah zawtnak hneksaknak cu biatakte in kalpi a timh. A chimmi cu nikhat ah minung 5 million bak hneksak an si cang lai. Hi hneksaknak nih hin chawlehthalnak hun ṭhannak kong ah tampi a ṭhathnem lai tiah a chim.

Hi hneksaknak nih hin zei buainak le hnahnawhnak hmanh a chuahpi ai lo. Hneksak a herhmi paoh cu hneksak an si cang lai tiah President Trump nih a chim. Trump nih a Twitter ah a ṭialmi cu vawleicung ramdang vialte nak in kan tuahmi a ṭha deuh i hmai ah kan fong deuh. Hneksaknak zong tamdeuh in kan tuah. Thawngzamh media pawl nih cun soisel le thangchiat “complain” dah tilo cu an tuahmi a um loh. Zei tluk thil ṭha kan tuah hmanh ah thil ṭha kan tuahmi kong an chim loh. Thangchiat le soisel lawnglawng an thiam tiah a ṭial.

Trump cozah nih hi bantuk in timhtuahnak an ngeihmi hi phunhnih in an kalpi lai. Cun state cio hna zong nih anmah le an i timhtuahning cio in kalpi ding in le an rianṭuannak le tuahmi cung cio ah federal cozah nih hnulei in ṭanpi ding ti a si. Khatlei in Gvernors pawl le lawmakers pawl hna zong nih a ngan a dammi hneksaknak tuah ding cu federal cozah nih nawl a peek cang hna.

Hi hneksaknak hna hi inn ah i erh chung ah tlamtlinh ding in timhtuah an si. President Trump nih a biachimnak ah a langhter pengmi cu hi zawtnak nih a chuah pimi thinphannak le harnak hna ruang ah hin rampi chawlehthalnak faaktuk in hna a hnawh sual lai ti hi a si. A si khawhchung in zawtnak zong dohpah bu in rampi chawlehthalnak hi humhim a timhmi cu a si. Ref: ABC News