Myanmar ramchung ah coronavirus a ngeimi minung 20 bak an um cang tiah fehter a si cang. Cu lawng silo in zawtnak a ngeimi hi nikhat hnu nikhat in an karh chin lengmang tiah an chim chih. Cu caah a cozah lei le ramchung mithiam pawl hna an lungre a thei ngaingai cang. An chimmi cu a ra laim zarh hnih chung hi cu kan harsa taktak lai ti a fiang ko tiah an chim.

A sinain ram innpa Thailand he cuaithlai ah cun Myanmar cu a tlawm lei a si ko rih tiah an chim chih. Thailand ah hin a tu tiang hi zawtnak a ngei tiah cozah nih fiangte in theih cangmi hna hi minung 1,800 renglo an si cang.

Myanmar ram ah a hlei in buainak a ummi pakhat cu ramchung ah hi zawtnak an ngei maw ngeilo timi hneksaknak thilrih tlamtling ah a zahnga in a umlo hi a si. Cu caah minung zeizat set nih dah hi zawtnak hi an ngeih cang timi zong fiangte in hngalh a har ngaingai. Mi tampi an thin a phanmi cu Myanmar nih ngandamnak lei ah a herhmi thilri tlamtling in a ngeihlo ca le a zawmi hna thlawpbulnak kong ah thilri a tlamtlinlo hi a si. Cu caah UK Embassy Yangon hna nih cun British rammi Myanmar ram ah a ummi paoh paoh cu a rannak in le a si khawhchung in tlung zok zok ding in March 17 ah khan a thanh cang hna.

Myanmar cu vawleicung ah ram siifaak pakhat a si bantuk in le ramchung luhchuahnak van zuanglawng hna phih a si sual ah cun tiah ramchung ah a ummi ramleng minung tampi hna cu an thin a phang ngaingai. A sinain chanthar fiamthiamnak hna le pumpaak thawngzamhtu tampi hna nih vawlei ah a cangmi thil kong nitin te in an thanh khawh hi kan caah a tthahnem ngaingaimi a si, tiah an chim chih chih.

Hi bantuk thawngpang le thi sining ruang ah hin a cozah nawlngeitu hna zong an lungre a thei ngaingai cang. Mipi sin ah an chimmi cu a si khawh chung in inn ah um ding in le inn in rian zong ttuan ding in an forhfial ve cang hna. Yangon le khuapi dang cheukhat hna ah cun hmuh setsai lomi minung an hmuh hna paoh ah an thin a phang cang ti a si. Mandalay le bang ah cun Chinese pawl le a dang ramdangmi pawl hna cu an ttih ngaingai hna i an hmuh hna paoh ah ramchung minung cheukhat lebang cu an thin a hung colh cang tiah an chim chih.

Hi kong he pehtlai in Thailand ah rian a ttuanmi Myanmar minung ramchung ah a rak kirmi hna zong ni 14 chung bak a dangte in chiah an si. Myanmar’s Ministry of Health and Sports hna nih cu pathianni ah khan mipi sin ah ralrin peeknak faakpi in an chim. Ram innpa hna ah rian a rak ttuanmi minung tampi ramchung ah an rak kir tthan caah i ralring cikcek u tiah an chim. Hi bantuk in a rak tlungmi hna hi hngalh cawk zong an ve lo caah ram hruaitu a cozah hna zong ramchung ah hi zawtnak hi a karh tuk sual lai tiah an thin a phang ngaingai. Ref: Irr