Kan rak thlah cang bantuk in India ram zong ah coronavirus cu nikhat hnu nikhat in a karh ching lengmang. Nihin tiang ah minung 3000 renglo nih zawtnak an ngeih cang. Cu caah a cozah nih mipi zulhphung a thar in an chuah tthan cang. Tuchun rinni (Saturday) ah zulhphung thar an chuahmi cu ram mipi vialte nih a herhtuk caan i leng nan chuah tik ah hmaikhuh nan hman dih cio lai tiah an thanh.

Hi mahte nih i tuahmi hmaihuhnak zong nih hin pumpaak ngandamnak caah tampi a bawmh ko. A bik in hi coronavirus in i runvennak ding caah hin ram tampi nih hmaikhuh hi hman ciomi zong a si fawn. Midang he neih tuk in tthutdir le khuasak zong cu hlan bantuk in nan i zuam rih lai. Leng nan chuah tik hrimhrim ah cun hmaikhuh i khuhlo in nan chuak lai lo tiah an chim.

Pahnihnak ah a ngan a dammi nan si zong ah siseh, cun a thawchuah ai harh deuhmi hna lebang nih cun hmaikhuh hi nan inn in innpa ah nan kal sual hmanh ah nan hman lai. Hi bantuk in tuahnak nih hin pumpaak ngandamnak a runven lawng silo in mipi community runven zong a si tiah an chim chih.

Hi inn ah mahter in i tuahmi hmaikhuhnak hi ngandamnak lei rian ttuntu hna, Covid-19 a ngeimi he pehtlai in khua a sami hna le Covid-19 in a zawmi hna nih cun nan hmang lai lo. Mah bantuk minung pawl nih cun a hleikhun ttha in tuahmi hmaikhuhnak nan hman lai.

Cu bantuk in hmaikhuhnak hna cu tthate in nan suuk hna lai. Nan suuk tik zong ah tisa in suuk i tthate in nan fimtawl hna lai. Nan hman ti lomi zong nan duhnak hmun paoh ah nan hlawnh hna lai lo tiah a thanh. Ref: Times of India