Hi coronavirus dohnak ah hin a ho paoh kan i tel dih. Cu caah a ho paoh nih kan tuah ding le tuahlo ding hi fiangte in kan i theih a herh. Cu bantuk in kan i theih khawhnak hnga nawlngeitu hna nih fiangte in mipi sin ah thanhnak tuah cu a biapi taktakmi le a herh taktakmi a si. A caan te ah kan herhning in thawng i thanh le zulh cu a tu tiang rih ah cun kan himnak lam umchun a si ko rih. A tanglei ah hin kan unau Mizo pawl nih hi raal dohnak ah mipi nih zulh ding phung an ser tharmi kan langhter. Kan ram zong nih cawn phumi tampi an um kho.

Nizan ah khan Mizoram State Level Task Force (SLTF) cu chairman Lalnunmawia Chuaungo, chief Secretary hruainak in Secretariat conference hall ah khuakhannak ngeih a si. I erh chung hi sauh a si caah hi caan chung ah hin International boundary le state boundary pawl cu pehtlai in khaar an si rih lai.  A sinain Bairabi le Vairengte kalnak lampi tu cu nawl peekmi thilphur pawl caah cun kal khawh a si ko rih lai.

Mipi khualtlawnnak mawtaw pawl tu cu kalter an si hlei rih lai lo. Cun ramri ah hin ttha taktak in duty a si lai. State leng lei in thilri luhpi khawh dingmi chung ah nifatin kan herhmi (essential commody) pawl cu nawlpeknak ca a dangte in laak a hau lai lo nain Vairengte SDO (civil) a silo ah Bairabi SDC sin ah fianternak an tuah a hau lai.

Nifatin in kan herhmi a si lem lomi thil dang steel, cement, brick, balu, inn saknak thilri tibantuk pawl zong luhpi khawh cu an si ko lai nain Home Department sin ah theihpinak le hnatlaknak ca an laak hmasa a hau lai. Cun DC sin ah nawlpeknak ca laak hnu ah Mizoram chung in a chuakmi sathil-arva le thlai pawl hna cu Mizoram hmunkip ah luhchuahpi khawh an si lai.

Thilri dangdang pawl luchuahpinak kong ah mobile application siam a si lai i tlamtlinh a si bak in a tu ah timhtuah ciami vialte zong hi a herhning in thlennawn khawh an si lai. Biakinn, fimcawnnak hmun, lentecelhnak hmun pawl, movie theatre, gym, community hall, restaurant, shopping complex, mall tibantuk pawl cu pehtlai in khaar an si ko rih lai. Mithi vui tik ah minung 20 nak tam khal khawh a si lai lo. Cozah rianttuan group A le B pawl cu cuhlan bantuk in rian ah kal khawh a si lai i group C le d tu cu cheuthum cheukhat lengmang in a kal an i chawng lai.

Cu bantuk in office chung ah nawl hal hmasa lo le nawlpeknak um hmasa lo in a ho hmanh luh khawh a si lai lo. Thanchonak caah ttuan a herhmi ti luannak siam, lam remh, lawm cawh, inn sak, hlei donh tibantuk pawl cu rian a umnak district rian ttuantu pawl hnatlaknak in ttuan an si lai. Cu bantuk rian ttuantu ding caah cun state chung ah a ummi minung lawng laak an si lai. Lo tuahtu, dum ngetu, satthil zuatu, nga a zuatu tibantuk pawl cu nawl hal haulo in an rian ttuan sianh an si. A sinain cu bantuk rian ttuan tik ah minung panga cung cu hmunkhat ah rian ttuan khawh a si lai lo. Electrician, plumber, mechanic, thing le cement mistiri le a bawmtu pawl cu an rian ttuannak Local Task Force theihpinak in rian ttuan sianh an si lai. DC nawlpeknak in lung laaknak hmun ah lunglaak, tlakrawh siam, thing-ah, tibantuk pawl ttuan sianh an si lai. Cu bantuk rian a ttuantu hna nih an herhmi thilri cawkzalh tik zong ah DC nawlpeknak tthiamtthiam in cawkzalh an si lai tiah an thanh. Ref: Vanglaini

Chap: Hihi Mizoram state an i hruai ding ningcang fiangfai ngai in mipi sin ah an thanhmi cheukhat an si. A dangdang hna zong an lum len rih. An rian ttuaning zoh tik ah thangtthat an tlak ngaingai. Kan Chin ram cozah zong nih hi bantuk in mipi nih kan tuah khawhmi le tuahkhawh lomi thil pawl mipi sin ah fiangfai te in thanhnak tuah si seh law a ttha ve ko hnga lo maw cu hlan zong ah thanh cu an thanh ve ko. Nihin kan nikhua hi caan chia a si caah thil hmete ah kan ruahmi thil hna hi kan caah thihnak a kan phanh pitu thil an rak si kho ko. Fianternak: hmanthlak hi cu google ta laak chommi a si.